Library · hlt

1MA 1

1:1 Kittim kho lamkah aka lo Macedonia Philip capa Alexander loh Persia neh te Mede manghai Darius te a ngawn tih amah te manghai la tloep om. Anih he Greek manghai la om bal coeng. 1:2 Anih te caem khaw muep a tloek tih khopuei vongcak khaw a noeng coeng. Diklai manghai rhoek khaw muep a duek sak. 1:3 Diklai khobawt a poeng tih namtom khaw muep a poelyoe coeng. A mikhmuh ah diklai he a mong hatah a thinko ah muep pom uh. 1:4 Rhalkap thaom te muep a coi tih ram tom, kho tom neh mangpa rhoek te a uk. Te dongah amih te anih taengah mangmu aka pae la boeih om uh. 1:5 Te phoeiah tah anih te tlo tih a duek ham te a ming. 1:6 Te dongah a boei hinyanah rhoek a khue. Amih tah a camoe lamloh hmaih rhoeng uh. Te dongah amah a hing vaengah a ram te amih hamla a boe pah. 1:7 Te phoeiah Alexander te kum hlainit manghai pueng tih duek. 1:8 Te phoeiah tah a rhalboei rhoek loh uktaem ham hmuen rhip a loh uh. 1:9 Anih a dueknah hnuk tah rhuisam te rhip a khuem uh. Amih kah cadil rhoek long kum a sen te tlam te om. Te dongah diklai ah boethae muep a saii uh. 1:10 Amih manghai Antiokus capa Antiokus Epiphnanes tah tholhnah aka poe sak a yung la om. Anih loh Greek ram he kum BC ya sawmthum parhih vaengah a uk. 1:11 Te vaengah tue hmuiyoi rhoek te Israel khui lamloh ha toeng. Hlang yet a phaelh la a mawt tih, “Ceh, mamih taengkah Gentile rhoek te paipi sai sih. Amih taengah a hloeh la om vaengah tah mamih soah puenthae la muep pai coeng,” a ti uh. 1:12 Tekah ol te amih long khaw a ngaingaih uh. 1:13 Pilnam khuikah a ngen tah Gentile rhoek khosing bangla amih soah aka saii manghai taengla caeh bahoeng a ngaih uh. 1:14 Te dongah Gentile kah khosing bangla Jerusalem ah luemhnangnah hmuen a sak uh. 1:15 Amih kah yahhmueirhetnah te a voeih uh paipi cim khaw a hnawt uh, Gentile rhoek bongyong uh thae tih a thae hno boeih te a saii uh. 1:16 Amah te manghai la khakh a pai phoeiah tah Antiohus loh Egypt te muk ti Syria bangla te khaw uk hamla cai. 1:17 Te dongah Egypt te sangpho len neh, caempuei caempa neh, leng neh, vuei neh, hnophuei neh a muk. 1:18 Caem te a caeh vaengah tah Egypt mangha Ptlolemy khaw vik yong tih a rhalkap te muep a ngawn pah. 1:19 Antiokus loh Egypt kah khopuei vongcak rhoek te a loh thai tih khohmuen pum te a poel a yoe. 1:20 Egypt a loh phoeikah kum ya sawlim pathum vaengah tah, Antiokus te a caempuei caempa neh cetih Israel khohmuen khaw, Jerusalem khopuei te khaw a paa. 1:21 A mangkhak la bawkim khuiah kun tih sui hmueituk neh hmaitung khaw hnopai boeih te a loh. 1:22 Boeipa taenga a nawn ham buh a khuehnah caboei khaw, boengloeng khaw, baeldung khaw, tha-am khaw, hniyan khaw, rhuisam khaw a loh. Bawkim hmai kah sui te khaw boeih a khong. 1:23 Sui neh cak khaw, a phu aka tlo hnopai khaw, thakvoh khuikah kawn a hmuh boeih te a khaw a loh. 1:24 Te phoeiah amah kho la a khuen. Pilnam te muep a ngawn tih amah te nen te muep hoem. 1:25 Israel ram tom ah rhungrhanah muep om. 1:26 Ukkung neh mawtkung tah kothae kopang, Tongpa camoe neh huta camoe tah a tha bawt, Huta kah a sakthen khaw muei, 1:27 Yulokung boeih loh layaeh ni a sak, Vasanu khaw a im khui nguekcoi, 1:28 Ka pilnam loh yahpohnah himbai ni a bai, Amih kong kah ka khohmuen khaw boeih thuen. 1:29 Kumnit a koe phoeiah tah Antiokus loh Mysia lamkah caempuei te Judae khopuei rhoek la a tueih. 1:30 Rhalkap rhoek te Jerusalem la a kun vaengah a rhalboei loh a pilnam te, rhoepnah ol te a paek. Tedae amih te phaeng a thailatnah. Te vaengah khopuei te a nah la a tloek coeng. A tloh la a ueng thil dongah pilnam te muep a ngawn. 1:31 Khopuei te a poel a yoe tih hmai neh a hlup. Im neh vongtung khaw boeih a koengloeng pah. 1:32 Anih neh a rhalkap rhoek loh huta camoe te thongtla a tuuk tih saelhung khaw a loh pah. 1:33 Te vaengah Antiokus neh a caem loh im sang khaw, rhaltoeng im khaw, Bawkim kah tlangpuei ah a sak tih, rhalmah im la coeng. 1:34 Amih long te Judah hmuiyoi rhoek a khuen tih pahoi a om sak. 1:35 A rhalkap khaw, caakok khaw, Jerusalem kah a loh hnopai te a khaw te lam te a khuen tih a khueh. Te dongah rhalmah hmuen te khopuei la poeh. 1:36 Rhalmah hmuen loh bawkim a taeng, a mangkhak la, Israel aka toeh boethae la ni oe. 1:37 Pilnam ommong te hmueihtuk taengah a ngawn uh Hmuen cim te ngawnnah neh a poeih. 1:38 Jerusalem pilnam tah a rhihhul ah yong coeng, Khopuei tah kholong kah a hmuentuek la poeh. Jerusalem te a pilnam ham kholong la poeh, Amih kho a khopuei te a hnoo uh coeng tih. 1:39 A bawkim te a hong neh khosoek lah poeh, A khonue khaw rhungnah khohnin la coeng, Omngaihnah Sabbath khaw yahpohnah la, Hinyahnah khaw hnaelcoenah la poeh. 1:40 A yahponah te lamhma kah thangpomnah tluk la len A pomsangnah khaw a tangrhom dung kah rhungrhah nah la om. 1:41 Te vaengah Antiokus loh a ram khuikah hlang he amah khosing boeih hnawt saeh lamtah pilnam pakhat la om saeh tih oltloeknah te boeih a pat. 1:42 Gentile boeih neh Irael khoe khaw anih kah oltloek dongah muep kun uh. 1:43 Kholong kah bawknah te langya la a pom uh tih mueirhol taengah tho a tueng uh. Te dongah Sabbath te khaw tuem uh voel pawh. 1:44 Manghai loh puencawn te Jerusalem neh Judea khopuei tom la a tueih tih oltloek te a pat. Pilnam te a ram neh benbo benpang mueh khosing te vai sak ham ol a paek. 1:45 Hmueihhlutnah khaw, khocang khaw, misurtui khaw Bawkim ah nawn pawt ham ol a paek. Sabbath neh khotue vaengah khaw omthawt hnin kah bibi bangla tueih ham ol a paek bal. 1:46 Bawkim neh a khuikah hnocim boeih te poeih hamla ol a paek. 1:47 Bawknah tloe khaw hmueihtuk, bawkim neh, cangimphu sak ham khaw, ok neh rhamsa rhalawt te nawn ham khaw ol a paek. 1:48 A ca rhoek yahhmui rhet ham khaw a khang pah tih, a saithai khui tah rhalawt hno te a saii sak. 1:49 Te dongah Boeipa loh Moses kut aha a paek olkhueng te khaw a hnilh uh tih a olpaek te vai ham ngaih uh voel pawh. 1:50 Manghai oltloek aka aal aal tah dueknah ni dantatanah la a om coeng. 1:51 Manghai loh a ram pum ah amah te oltloek a khueng bueng kolla, pilnam aka dawn ham khoboei te a tuek tih Judea khopuei kholong hmueih te rhip a nawn sak. 1:52 Te dongah Judah rhoek tah olkhueng hnawt tih khoboei ol ngai ham te muep cai uh. 1:53 Amih khoboe te a tanolh vaengah taih Israel tang rhoek te a coeng thai khuila boeih thuh uh. 1:54 Kum ya sawmli kum nga Kislve hla hnin hlai nga vaengah manghai Antiokus loh Bawkim hmueituk dongah sarhingkoi te a hol. Judea khopuei tom ah kholong kah hmueihtuk te a suem sak. 1:55 Imhmai neh thingkung ah kholong hmueih te a nawn sak. 1:56 Olkhueng cabu a hmuh carhui te a phen tih a hoeh pah. 1:57 Cabu cim aka pom tih, olkhueng aka tuem te a tuuk coeng atah manghai loh a dueknah ham ni dan a tat coeng. 1:58 Hlakhat phoeiah hla khat halang rhoek loh a saithainah a hnonah tih Israel ca te khopuei khuiah a tuuk uh. 1:59 Te kah hla hnin kul hnin nga vaengah amah hlang thae rhoek loh Bawkim hmueihtuk soah kholong kah hmueituk te a suem uh. 1:60 A ca yahhmui rhet hamla aka pae manu boeih te manghai kah oltloek bangla dueknah neh dan a tat uh. 1:61 Camoe te khaw a rhawn ah a oi sak uh, a imkhukho khaw yahhmuirhet ham aka pae boeih te a duek sak uh. 1:62 Tedae manghai oltloek khak aka aal tih, aka cuemcaih mueh buh caak ham aka thanah he Israel khuikah pilnam khaw muep om van. 1:63 Amih long tah a cim paipi te aek tih rhalawt buh caak lakah atah a duek ham te a ngaih uh ngai tih muep duek uh van. 1:64 Pathen kah thintoenah loh Israel te muep a patangnah hamla a saii.