Psalms 119
119:1 Tinang a lam hta mara n rawng ai ni hte, Yehowa a tara hpe hkan nang ai ni, a lu ma ai.
119:2 Shi a sakse ga hpe matsing nga nna, Myit yawng hte shi hpe hkan tam ai ni, a lu ma ai.
119:3 Shanhte gaw n hkru ai amu n galaw ma ai, Shi a lam hta e, hkawm nga ma ai.
119:4 Na a ga matsun hpe htep lahti hkan lu mu ga, Nang anhte hpe htet da nit dai.
119:5 Na a ga madat hpe hkan nang lu hkra, Nye a lam ding nga u ga!
119:6 Shaloi nang htet da mada hpe dum nga yang, Ngai kaya kahpa n hkrum na nngai.
119:7 Na a dinghpring ai tara dara ai lam hpe sharin yang, Myit malang ai hku hkan nna, ngai nang hpe shakawn na nngai.
119:8 Na a ga madat ngai hkan nang na nngai, Ngai hpe hkum kabai kau et.
119:9 Shabrang wa gaw, shi a lam pra nga u ga, kaning rai na rai ta? Na a mungga hte maren sadi nga yang, rai na ra ai.
119:10 Nye myit mahkra hte, ngai nang hpe tam ni ai; Nang htet da ai ga hpe ngai n lai n ga.
119:11 Ngai nang hpe n shut n hpyit n ga, Na a ga hpe, nye a myit hta, ngai bang da se ai.
119:12 Yehowa e, nang a lu ndai, Na a ga madat, ngai hpe sharin ya e.
119:13 Na n-gup na tara dara ai hku yawng hte hpe, Nye a nten hte, ngai hkai dan na nngai.
119:14 Sutgan lu la ai hta grau nna, Na a sakse ga hta, ngai kabu nga nngai.
119:15 Na a ga matsun hpe, ngai myit aru nga nna, Na a lam shagu hpe yu nga na nngai.
119:16 Na a ga madat hta e, ngai awng nga nna, Na a mungga hpe n malap kau na nngai.
119:17 Na a mayam wa hkrung nga u ga, shi hpe yu lahku u; Shaloi na a mungga hpe, ngai hkan nang na nngai.
119:18 Na a tara hta mauhpa lam mu lu n ga, Nye a myi hpe jahpaw ya e.
119:19 Ga ntsa e, manam sha ngai rai nga nngai, Na a htet da ai ga, nye a man e, hkum makoi da u.
119:20 Nang tara dara ai lam hpe, myit marit nga nngai majaw, Nye a myit masin ahkying shagu ndawt nga ai.
119:21 Nang gaw gumrawng ai ni hpe, daru kau nit dai; Nang htet da ai ga hpe tawt lai ai ni, dagam kau ai hkrum ma ai.
119:22 Na a sakse ga hpe, ngai hkan nga nngai majaw, Shatan nhkan hte asawng asang re ai hta na, ngai hpe shalawt dat e.
119:23 Du salang ni nye a lam bawng ma timung, Na a mayam wa na a ga madat hpe a myit yu nga ai.
119:24 Na a sakse ga, ngai awng shara hte, Ngai hpe hpaji daw ya ai ga, rai nga ma ai.
119:25 Nye a myit masin ga nhpu hta a jung nga ai: Na a ga hte maren ngai hpe jahkrung ya e.
119:26 Nye a lam ngai hkai dan nngai rai nna, nang ngai hpe htan ya nit dai; Na a ga madat, ngai hpe sharin ya e.
119:27 Na a ga matsun ngai hpe chye na shangun e, Shaloi, na a mauhpa amu hpe ngai myit yu nga na nngai.
119:28 Yawn la nngai majaw, nye a myit masin hkrap nga ai; Na a ga hte maren, ngai hpe sharawt la e.
119:29 Masu ai lam ngai hte shatsan kau ya nna, Matsan dum let, na a tara ngai hpe jaw e.
119:30 Sadi sahka ai lam ngai lata la ni ai, Na a tara dara ai hku, ngai dum nga nngai.
119:31 Na a sakse ga hta ngai a noi nga nngai; Yehowa e, ngai hpe kaya kahpa hkum hkrum shangun et.
119:32 Nye a myit hpe nang hpaw ya ndai majaw, Nang htet da ai lam de, ngai gat nga nngai.
119:33 Yehowa e, na a ga madat lam ngai hpe sharin ya e; Prat htum hkra, ngai dai hpe hkan nang na nngai.
119:34 Chye chyang ai myit ngai hpe jaw rit law; Shaloi na a tara hpe myit ting hte hkan nang na nngai.
119:35 Nang htet da ai lam hku e, ngai hpe woi wa e; Dai hta e ngai awng nga na nngai.
119:36 Nye a myit lawhpa ai de n rai u ga, Na a sakse ga hpang de, dai hpe kayin ya e.
119:37 Kaman lila hpe n mu n ga, nye a myi kayin la ya e: Na a lam hta ngai hpe jahkrung da e.
119:38 Nang hpe hkrit hkungga na, nga ai ga sadi, Na a mayam a ntsa e, shadik ya e.
119:39 Ngai hkrit nga we ai, shatan nhkan hpe la kau u; Na a tara dara ai lam mai kaja nga ai.
119:40 Yu u, na a ga matsun ni hpe ngai marit nga nngai, Na a dingman ai hte ngai hpe jahkrung da e.
119:41 Yehowa e, na a chyeju hte hkye hkrang la ai lam, Na a ga hte maren, ngai kaw du u ga.
119:42 Shaloi, na a ga hta shamyet nga nngai majaw, Ngai e shatan ai wa hpe htan lu na we ai.
119:43 Na a tara dara ai lam hpe kam nga nga nngai majaw, Nye a n-gup hta na, sadi sahka ai ga hpe hkum dawm la u.
119:44 Shaloi htani htana prat dingsa e n hprai hkra, Na a tara hpe ngai hkan nga na nngai.
119:45 Na a ga madat hpe ngai tam nga nngai majaw, Numdaw numdan n hkrum ai, ngai hkawm sa lu nngai.
119:46 Hkawhkam ni a man e na a sakse ga hpe, Ngai hkai dan nna, kaya kahpa n hkrum na nngai.
119:47 Ngai tsawra ai, na a jep ai tara hta, Ngai ngwipyaw nga na nngai.
119:48 Ngai tsawra ai, na a jep ai tara hpe, Nye a lata ngai sharawt na we ai rai nna, Na a ga madat hpe a myit yu nga na nngai.
119:49 Ngai hpe myit mada shangun ai majaw, Na a mayam wa hpe nang tsun ai ga, adum nga u.
119:50 Na a ga hte ngai bran nga nngai, Dai gaw nye a nni nkri hta e, ngwipyaw shara tai wa ai.
119:51 Gumrawng ai ni, ngai hpe ja ja jahpoi ma timung, Na a tara hpe ngai n lai nga nngai.
119:52 Yehowa e, chyaloi nhkoi na, na a dawdan ai hpe, Ngai dum nga nna, ngwipyaw nga nngai.
119:53 Na a tara hpe kau da nga ai n hkru ai ni a matu, Ngai myit ja ja kahtet nga nngai.
119:54 Ngai manam rai nga ai nta hta e, Na a ga madat, nye a mahkawn ga tai nga ai.
119:55 Yehowa e, shana aten e, na a amying hpe ngai dum nga nna, Na a tara hkan nga na nngai.
119:56 Na a ga matsun hpe matsing nga nngai majaw, Dai hta ngai pyaw nga nngai.
119:57 Yehowa e, nye a sali wunli nang rai nga ndai; Na a mungga hpe hkan nang na, ngai myit da ni ai.
119:58 Nye a myit mahkra hte, ngai nang hpe hpyi nga nngai; Na a ga hte maren, ngai hpe matsan dum la e.
119:59 Nye a lam hpe ngai myit yu nga nna, Na a sakse ga hpang de, kayin wa nngai.
119:60 Na a sakse ga hpe hkan nang nga na, Ngai n ganung, alawan rai nga nngai.
119:61 Tara n lang ai ni a sumri ngai hpe kawan nga timung, Na a tara hpe ngai n malap kau nngai.
119:62 Na a dingman ai tara dara ai lam majaw, Nang hpe shakawn na, ngai yuptung e rawt na nngai.
119:63 Nang hpe hkrit kamyin ai ni mahkra hte, Na a ga matsun hpe hkan ai ni a manang, ngai rai nga nngai.
119:64 Yehowa e, ga ntsa e, na a chyeju hte hpring nga ai; Na a ga madat ngai hpe sharin ya e.
119:65 Yehowa e, na a ga hte maren, Na a mayam wa hpe nang kaja ai lam galaw nit dai.
119:66 Nang htet da ai ga ngai kam nga nngai majaw, Kaja ai hpaji hte chye chyang ai lam, ngai hpe sharin ya e.
119:67 Nni nkri garai n hkrum yu yang, ngai lam dam ni ai; Ya chyawm gaw, na a ga hpe ngai hkan nga nngai.
119:68 Nang kaja nga nna, kaja ai amu galaw nga ndai; Na a ga madat ngai hpe sharin ya e.
119:69 Gumrawng ai ni ngai hpe masu ai ga shatu ma timung, Ngai gaw myit mahkra hte na a ga madat a hkan nga nngai.
119:70 Sau zawn shanhte a myit ge mat malu ai; Ngai chyawm gaw na a tara hta e, awng nga nngai.
119:71 Na a ga madat ngai sharin la lu na, Nye a matu nni nkri hkrum na, mai nga ai.
119:72 Na n-gup hta na pru ai tara gaw, nye a matu Aja gumhpraw hkying mi hta grau kaja nga ai.
119:73 Na a lata ngai hpe hpan da nna hkrang shabyin nu ai; Nang htet da ai ga hpe, ngai sharin la lu hkra, Ngai hpe chye chyang ai myit jaw ya e.
119:74 Na a ga hpe ngai myit mada nga nngai majaw, Nang hpe hkrit kamyin ai ni, Ngai hpe mu yang, kabu lu na mara ai.
119:75 Yehowa e, na a tara dara ai lam, dingman nga ai rai nna, Sadi sahka hte nang ngai hpe sharin ndai hpe, ngai chye nga nngai.
119:76 Na a mayam wa hpe tsun da ai hte maren, Na a chyeju gaw, ngai hpe shapyaw ya u ga.
119:77 Na a tara, ngai awng wa na lam rai nga ai majaw, Ngai hkrung nga lu hkra, na a chyeju ngai kaw du u ga.
119:78 Gumrawng ai ni ngai hpe masu kau mi ai majaw, Shanhte kaya kahpa hkrum na mara ai; Ngai chyawm gaw na a ga matsun hpe myit yu nga nngai.
119:79 Nang hpe hkrit kamyin ai ni hte, na a sakse ga hpe chye lu ai ni, Ngai hpang de kayin wa maru ga.
119:80 Ngai kaya kahpa n hkrum n ga, Na a ga madat hta e nye a myit tsup nga li ga.
119:81 Nye a myit masin, na a hkye hkrang la ai lam hpe marit nga ai; na a mungga hpe ngai myit mada nga nngai.
119:82 “Nang ngai hpe galoi shapyaw na n kun?” nga nna, Na a ga ndat mada lu hkra nye a myi tsu nga li ai.
119:83 Wan nhkut hta garau ai shanhpyi htingpa zawn, ngai tai mat nngai rai timung, Na a ga madat hpe ngai n malap kau nngai.
119:84 Na mayam wa a nhtoi ni, gade gadun nga a hka! Ngai hpe zingri ai ni e, Nang galoi me dawdan na mu ta?
119:85 Gumrawng nna na a tara hpe n hkan nang ai ni, Nye a matu nhkun htu ma ai.
119:86 Na a jep ai tara nlang, sadi sahka rai nga ai: Masu let shanhte ngai hpe hkan shachyut ma ai; ngai hpe karum la e.
119:87 Shanhte gaw lamu ga hta e ngai hpe ganoi noi jahten ma timung, Na a ga matsun hpe ngai n kau da nngai.
119:88 Na a chyeju hte maren, ngai hpe shabran ya e, Shaloi na a sakse ga hpe ngai hkan nga na nngai.
119:89 Yehowa e, htani htana e na a mungga gaw, Sumsing lamu hta e agrin nga ai.
119:90 Na a sadi sahka prat mi hte prat mi anga nga ai, Aga hpe nang gaw da nna, dai anga nga ai.
119:91 Dai ni jang, na a tara hte maren, dai arai ni anga nga ma ai, Arai yawng mayawng na a ali ama ni rai nga ma ai.
119:92 Na a tara nye a kabu gara ai lam n rai taw gaw, Nye a nni nkri hta e, ngai hten byak na ni ai.
119:93 Na a ga matsun hte ngai shabran ai hkrum nngai majaw, Dai hte hpe ngai galoi mung n malap kau na nngai.
119:94 Na a ga matsun hpe ngai tam nngai majaw, Na a ma ngai rai nga nngai: ngai hpe hkye la e.
119:95 Tara n lang ai ni, ngai hpe jahten na hkap nga ma ai; Na a sakse ga hpe ngai myit yu nga nngai.
119:96 Lam magup hta e, tsup lu na hku ngai mu se ai; Nang htet da ai ga dam lada wa rai nga ai.
119:97 Na a tara hpe ngai kade wa tsaw nga n hka! Ngai shani tup dai hpe myit aru nga nngai.
119:98 Nang htet da ai ga majaw, ngai gaw gumlau ni hta grau nna hpaji lu nga nngai; Kaning rai nme law, dai gaw prat dingsa e ngai hta a rawng nga ai.
119:99 Na a sakse ga hpe ngai myit aru nga nngai majaw, Ngai sharin la ai sara ni yawng hta, ngai grau nna chye lu nngai.
119:100 Na a ga matsun ga hpe ngai hkan nga nngai majaw, Salang ni hta grau nna ngai myit su nga nngai.
119:101 Na a mungga hpe hkan nang lu na matu, Ngai n kaja ai lam yawng hpe koi kau nga nngai.
119:102 Nang ngai hpe sharin ya ndai majaw, Na a tara dara ai lam na ngai n lai nga nngai.
119:103 Na a mungga gaw gade dwi nga a hka! Nye a n-gup hta lagat jahku hta grau dwi nga ai.
119:104 Na a ga matsun hte ngai myit su nga nngai; Dai majaw masu ai lam shagu ngai n dawng nga nngai.
119:105 Na a mungga nye a lagaw a pyengdin hte, Nye a hkrun lam a nhtoi rai nga ai.
119:106 Na a dingman ai tara dara ai lam hpe hkan nang na, Ngai dagam da nna galaw ngut se ai.
119:107 Ngai nni nkri law law wa hkrum nga nngai, Yehowa e, na a ga hte maren ngai hpe shalan ya e.
119:108 Yehowa e, nye a n-gup a dingsa hkungga hpe hkap la u, Na a tara dara ai lam ngai hpe sharin ya e.
119:109 Nye a myit masin gaw nye a lata hta anga nga li timung, Na a tara hpe ngai malap mali kau na nngai n rai.
119:110 Tara n lang ai ni nye a matu mahkam hkam ma timung, Na a ga matsun hpe ngai n shut nga nngai.
119:111 Na a sakse ga nye a myit hpe shapyaw ya ai majaw, Dai gaw prat dingsa nye a sali wunli rai nga ai.
119:112 Na a ga madat htani htana a galaw nga na, Nye a myit masin hpe ngai saw da we ai.
119:113 Gale galau re ai ni hpe ngai n dawng nngai; Na a tara hpe chyawm gaw ngai tsawra nga nngai.
119:114 Nang gaw nye a makoi shara hte n-gang rai nga ndai; Na a mungga hpe ngai myit mada nga nngai.
119:115 N hkru ai ni e, ngai kaw na pru wa mu; Nye a Karai Kasang a htet da ai ga hpe ngai hkan nang na nngai.
119:116 Ngai hkrung nga lu nna, Nye a myit mada ai lam kaya kahpa n tai u ga, Na a ga hte maren ngai hpe shadaw ya e.
119:117 Ngai hpe shadaw yang, ngai mai wa na nngai; Shaloi na a ga madat hpe ngai tut tut a myit nga na nngai.
119:118 Na a ga madat hta na tawt lai ai ni hpe, nang n yawt nga ndai, Kaning rai nme law, shanhte a maw ai hku, masu ai hkrai rai nga ma ai.
119:119 Mung shagu na tara n lang ai ni hpe, Hkumpup hpe zawn, nang lai kau da mu ai: Dai majaw na a sakse ga hpe ngai tsawra nngai.
119:120 Nang hpe hkrit hkungga ai hte nye a ashan nshung si bun nga ai; Na a tara dara ai hpe mung ngai hkrit kamyin nga nngai.
119:121 Tara ai hte dingman ai lam ngai galaw se ai; Zingri ai ni kaw, ngai hpe hkum ap kau u ga.
119:122 Na a mayam wa a ngamai lu na matu ama hkam u; Gumrawng ai ni ngai hpe n zingri lu mi ga.
119:123 Na a hkye la ai lam hte dingman ai ga hpe, Nye a myi mada nna, atsu nga li ai.
119:124 Na a chyeju hte maren, na a mayam wa hpe galaw nna, Na a ga madat ngai hpe sharin ya e.
119:125 Ngai na a mayam wa rai nga nngai; Na a sakse ga hpe ngai chya lu n ga, Chye chyang ai myit ngai hpe jaw ya e.
119:126 Yehowa a matu amu galaw ai aten rai nga ai: Na a tara hpe shanhte hpa n nawn nga ma ai.
119:127 Dai majaw aja hte jet ai aja hta grau nna, Na a htet da ai ga hpe ngai tsaw nga nngai.
119:128 Dai majaw na a ga matsun nlang teng nga ai, ngai nga nna, Masu ai lam shagu hpe n dawng kau nngai.
119:129 Na a sakse ga mauhpa wa rai nga ai; Dai majaw nye a myit masin dai hta hkan nang nga ai.
119:130 Na a mungga hpe hpaw dan yang, nhtoi htoi wa nna, Myit n su ai ni hpe, kunghpan wa shangun mu ai.
119:131 Na a htet da ai ga hpe ngai marit la nga nngai majaw, Ngai n-gup mahka nga nna, sa dawn dawn nga nngai.
119:132 Na a amying hpe tsawra ai ni hpe nang di ang ai hte maren, Ngai kaw kayin nna, ngai hpe matsan dum la e.
119:133 Nye a lagaw hkang hpe na a ga hte shangang ya e; N shawp ai hpa mung, ngai hpe n up u ga.
119:134 Masha a kashun kashe hta na, ngai hpe shalawt dat e; Shaloi na a ga matsun hpe ngai hkan na nngai.
119:135 Na a mayam wa ntsa e, na a myi man jahtoi ya u ga; Na a ga madat hpe mung, ngai hpe sharin ya e.
119:136 Shanhte na a tara hpe n hkan ma ai majaw, Nye a myi kaw na hka zawn lwi nga ai.
119:137 Yehowa e, nang dinghpring nga ndai rai nna, Na a tara dara ai lam ni malang nga ai.
119:138 Na a sakse ga hpe dingman nga ai hte, Nachying sadi sahka rai nga u ga, nang htet da nu ai.
119:139 Ngai hpe hpyen ai ni na a mungga hpe malap kau ma ai majaw, Nye a nja nhpra ai myit ngai hpe shaza kau nngai.
119:140 Na a ga nachying jet nga ai rai nna, Na a mayam wa dai hpe tsawra nga ai.
119:141 Ngai gaw kaji nga nna hpa n ging nngai rai timung, Na a ga matsun hpe ngai n malap nngai.
119:142 Na a dingman ai gaw, prat dingsa e dingman nga ai rai nna, Na a tara gaw sadi sahka rai nga ai.
119:143 Ru tsang ai hte yawn hkyen ai ngai hkrum nngai rai timung, Na a htet da ai ga nye a kabu ga shara rai nga ai.
119:144 Na a sakse ga prat dingsa a teng nga lit dai; Ngai hkrung lu n ga, ngai hpe chye chyang ai myit jaw ya e.
119:145 Nye a myit mahkra hte ngai shaga nga nngai; Yehowa e, ngai hpe htan ya e; Na a ga madat hpe ngai hkan nang nga na nngai.
119:146 Na a sakse ga hpe ngai madat lu n ga, Nang hpe shaga yang, ngai hpe hkye hkrang la e.
119:147 Nhtoi garai n htoi yang, ngai jahtau nga nngai, Na a mungga hpe ngai myit mada nga nngai.
119:148 Shana na ladaw garai n lai lu yang, Na a ga hpe myit htang yu na ngai hprang nga nngai.
119:149 Na a chye hte maren, nye a nsen madat ya e; Yehowa e, na a tara dara ai hku hte maren, ngai hpe shalan shabran ya e.
119:150 N hkru ai myit rawng ai ni, sit ni wa ma timung, Na a tara hte shanhte tsan nga ma ai.
119:151 Yehowa e, nang gaw ni nga ndai; Na a htet da ai ga nlang tengman nga ai.
119:152 Na a sakse ga htani htana agrin nga ai hpe, Moi kaw nna ngai chye nga nngai.
119:153 Na a tara hpe ngai n malap kau nngai majaw, Nye a nni nkri yu nna, ngai hpe mawai la e.
119:154 Nye a amu hpe jeyang nna ngai hpe hkye hkrang la e; Na a ga hte ngai hpe shalan shabran ya e.
119:155 Tara n lang ai ni, na a ga madat hpe n tam ma ai majaw, Hkye hkrang la ai lam shanhte hte tsan nga ai.
119:156 Yehowa e, na a chyeju law htam nga ai; Nang dawdan ai lam hte maren, ngai hpe shalan shabran ya e.
119:157 Ngai hpe zingri ai ni hte hpyen ni law nga ma ai; Na a sakse ga hte ngai shai nga nngai n rai.
119:158 Hkalem sha ai ni na a mungga hpe n hkan nang ai majaw, Ngai shanhte hpe mu mada nna, myit yu machyi nga nngai.
119:159 Na a ga matsun hpe ngai tsaw nga nngai, dum nu; Yehowa e, na a chyeju hte maren ngai hpe shalan shabran ya e.
119:160 Na a ga sumhpa, sadi sahka rai nga ai; Na a dingman ai tara dara ai lam, htani htana agrin nga ai.
119:161 Mara n nga timung, du ni ngai hpe hkan shachyut ma ai; Rai timung, nye a myit na a ga hpe hkungga nga ai.
119:162 Lanep law law lu ai wa zawn, Na a ga hta ngai kabu gara nga nngai.
119:163 Masu ai ga hpe ngai ndang nna matsat nga nngai; Na a tara hpe ngai tsawra nga nngai.
119:164 Na a dingman ai tara dara ai lam majaw, Lani mi hta e sanit lang, ngai nang hpe shakawn ga nngai.
119:165 Na a tara hpe tsawra ai ni gaw ngwipyaw kaba chye nga ma ai. Shanhte hta kadai mung myit kataw shara n nga ai.
119:166 Yehowa e, na a hkye hkrang la ai lam hpe ngai myit mada nga nna, Na a htet da ai ga hpe hkan nang nga nngai.
119:167 Nye a myit masin na a sakse ga hpe madat nga ai; Rai sa, dai hpe ngai ja ja tsawra nga nngai.
119:168 Na a ga matsun hte sakse ga hpe ngai madat nga nngai; Nye a lam yawng hte gaw na a man e rai nga ai.
119:169 Yehowa e, ngai jahtau ai ga, nang kaw du hkrang u ga; Na a ga hte maren ngai hpe shachye shachyang ya e.
119:170 Ngai hpyi jahtau ai ga, na a man e hkrang pru ga; Na a ga hte maren ngai hpe mawai la e.
119:171 Nang gaw na a ga madat ngai hpe sharin nga yang, Nye a n-gup shakawn kungdawn ga shapraw na ra ai.
119:172 Nang htet da ai ga nlang, dingman nga ai majaw, Nye a shinglet na a ga hpe mahkawn mangoi na ra ai.
119:173 Na a ga matsun hpe, ngai lata la nngai majaw, Na a lata ngai hpe karum nga n ga.
119:174 Yehowa e, na a hkye hkrang la ai lam hpe ngai marit nga nna, Na a tara gaw ngai kabu shara rai nga ai.
119:175 Nye a myit masin hkrung nga lu nna, nang hpe shakawn nga u ga, Nang tara dara ai lam ngai hpe karum nga n ga.
119:176 Ngai lam dam mat wa yang, Mat ai sagu kasha hpe zawn, na a mayam wa hpe hkan tam u; Kaning rai nme law, nang htet da ai ga hpe ngai n malap kau nngai law.