Psalms 140
140:1 Aw Lalpa, mi sual lakah chuan mi chhan him la; Mi nunrâwng lakah chuan mi humhim ang che:
140:2 Anni chuan an thinlungah thil tihsualte an ngaihtuah ṭhîn a; Do tûrin an inkhâwm fo ṭhîn.
140:3 An lei chu rûl angin an tihriam a; An heh chhûngah chuan rûlrial tûr a awm a. (Selah)
140:4 Aw Lalpa, mi suaksual kut lakah chuan mi vawng ṭha la; Mi nunrâwng lakah chuan mi humhim ang che: Anni chuan ka ke pênte hi nam kawi an tum a.
140:5 Mi chapote chuan ka awh nân thang an kam ru a, hruihrualte nên; Kawng sîrah chuan lên an phah a; Ka awh nân thangte an kam a. (Selah)
140:6 Lalpa hnênah chuan, “Nang chu ka Pathian i ni a: Aw Lalpa, khawngaih ka dîlna awte hi lo bengkhawn ang che.
140:7 Aw, Lalpa Pathian, mi chhandamna tichaktu, Nang chuan inbeih nîah chuan ka lû mi khuhsak a.
140:8 Aw Lalpa, mi suaksual duh zâwngte chu phal suh la; An ngaihtuahna sual chu puitlintîr suh ang che; Chuti lo chuan, an inchawimawi dah ang e,” ka ti a. (Selah)
140:9 Mi hual vêltute lû chu, Anmahni hmuia an thu sual sawi chuan khuh rawh se.
140:10 Meilingte an chungah tla sela: Meia paihin awm sela; An thawh leh tawh lohna tûrin khuarkhurum thûk takahte paihin awm rawh se.
140:11 Thu ṭha lo sawitu chu leiah hian tihnghehin a awm lo vang a; Mi nunrâwng tichhe tûrin thil ṭha lovin a pêl ang.
140:12 Lalpa chuan hrehawm tuarte chu an thûah a ṭan ang tih ka hria, Pachhiate chu an tâna âwm rêngah nên.
140:13 Matheilovin mi felte chuan i hming an fak ang a; Mi dikte chu i hmaah an awm ang.