Library · yue

路加福音 12

警戒偽善

1 嗰時,成千成萬嘅人聚集埋,甚至彼此踐踏。耶穌先對門徒話:「你哋要提防法利賽人嘅酵,即係佢哋嘅偽善。

2 一切隱藏嘅事都會被張揚出嚟;秘密嘅事亦會被洩露。

3 因此,你哋喺暗中所講嘅話要喺光天白日下被人聽到;你哋喺密室中對住耳邊所講嘅亦要喺屋頂上被宣佈出嚟。」

應該怕嘅係邊個

4 「朋友,我對你哋話,嗰啲只能殺人身體,不能進一步傷害你哋嘅,唔使怕佢哋。

5 我要指示你哋應該怕嘅係邊個:你哋要怕嗰位奪走人生命以後,又有權扔佢落地獄嘅上帝。我實在話你哋知,應該怕嘅就係佢!

6 五隻麻雀用兩個銅錢就買得到,但係上帝一隻都唔忘記;

7 就係你哋嘅頭髮佢都數過。所以,你哋唔使怕,你哋比好多麻雀貴重得多!」

認或唔認基督

8 「我話你哋知,凡喺人前認我嘅,人子喺上帝嘅天使前亦認佢;

9 凡喺人前唔認我嘅,人子喺上帝嘅天使前亦唔認佢。

10 講話冒犯人子嘅,可得赦免;但係褻瀆聖靈嘅,總不得赦免。

11 人帶你哋上會堂,或係帶到官長或統治者前受審問時,你哋唔使擔心要點樣為自己辯護,或係要講乜嘢話;

12 因為嗰時,聖靈會指示你哋應該講嘅話。」

無知嘅財主

13 羣眾之中有一人對耶穌話:「老師,請吩咐我嘅兄弟同我分父親嘅遺產。」

14 耶穌答話:「朋友,邊個俾權我為你哋審案或替你哋分家產呢?」

15 於是對眾人話:「你哋要謹慎自守,免去一切嘅貪心;因為人無論點樣富裕,佢嘅真生命唔在乎佢有幾多財產。」

16 耶穌又對佢哋講一個比喻:「有一個財主,田產豐富;

17 佢心裏思想話:『我冇足夠嘅地方嚟儲藏所有嘅穀物,點辦呢?』

18 佢又話:『我要將原有嘅倉庫拆去,改建一座更大嘅,嚟存放五穀同其他嘅貨物,

19 然後我要對自己話,幸運嘅人呀!你有好多財物積存,足夠你多年用,慢慢享受,飲飲食食,過舒服嘅日子!』

20 但上帝對佢話:『你呢個糊塗人,今晚,你要交出你嘅生命;噉樣,你為自己積存嘅一切財物歸邊個呢?』」

21 耶穌結論話:「凡為自己積聚財富、而對於上帝唔富足嘅亦係噉樣。」

信靠上帝

22 耶穌又對門徒話:「我話你哋知,唔好為生活上所需嘅食物,或身上所穿嘅衣服操心。

23 生命比食物貴重得多;身體亦比衣服貴重得多。

24 試睇吓啲烏鴉!佢哋唔撒種唔收割,亦冇倉庫或儲藏室,上帝尚且飼養佢哋,你哋比飛鳥貴重得多!

25 你哋中又有邊個能藉憂慮多活幾日呢?

26 你哋連噉樣嘅小事都做唔到,又何必為其他嘅事操心呢?

27 試想吓百合花點樣生長!佢哋唔使工作又唔縫衣,但係我話你哋知,甚至所羅門王榮華時,所着嘅都唔似得一朵野花咁靚。

28 野地嘅花草今朝出現,明日枯乾,扔落火爐,上帝尚且噉樣妝飾佢哋,何況你哋呢?你哋嘅信心太小咯!

29 所以,你哋唔好掛慮食乜嘢,飲乜嘢,為呢啲事煩惱。

30 呢啲事係世上唔信嘅人日夜所追求嘅。你哋嘅天父知道你哋必需用嘅嘢。

31 你哋要先追求上帝嘅國,佢就會俾呢一切嘅嘢你哋。」

論天上嘅財寶

32 「你哋小羣,唔使怕,因為你哋嘅父樂意將國賜俾你哋。

33 你哋要賣去所有嘅,將錢賙濟窮人;為自己預備唔會破壞嘅錢袋,將財寶存喺天上。喺嗰處,財寶係使用不盡嘅;因為盜賊偷唔到,亦冇蟲蛀蝕。

34 你哋嘅財寶喺嗰處,你哋嘅心亦喺嗰處。」

警醒嘅僕人

35 「你哋要隨時準備好,束緊腰帶,黑着燈,

36 好似僕人等候主人從婚宴返嚟。主人返嚟敲門時,佢哋立刻開門。

37 主人返嚟,發現僕人儆醒,佢哋就有福!我話你哋知,主人會束上腰帶,等佢哋坐落嚟食飯,親自伺候佢哋。

38 甚至主人延遲到半夜或黎明致返嚟,佢若發現僕人儆醒,佢哋就有福!

39 要記住呢一點:家主若知幾時有賊嚟,佢一定唔俾佢破門而入。

40 你哋亦要隨時準備好,因為人子會喺你哋意想唔到時來臨。」

可靠同唔可靠嘅僕人

41 彼得話:「主呀,呢個比喻係對我哋講嘅,抑或對大眾講嘅呢?」

42 主話:「邊個係可靠又機智嘅僕人,主人就指派佢嚟管理家務、佢按時分配糧食俾其他嘅僕人。

43 主人返嚟時,見呢個僕人忠於職守;呢個僕人就有福咯!

44 我實在話你哋知,主人將派佢管理佢所有嘅產業。

45 但係,若個僕人心裏話:『我嘅主人必定冇咁早返嚟』,於是動手毆打其他僕人同婢女,並且飲食醉酒,

46 主人會喺佢意想唔到嘅日子,喺佢唔知嘅時候返嚟。主人會重重責打佢,使佢同其他唔可靠嘅僕人同受懲罰。

47 僕人知主人要佢做啲乜嘢,但唔準備,亦唔照主人嘅意思做;佢就會受重重嘅鞭打。

48 嗰個唔知主人嘅意思而做咗該受鞭打嘅事嘅僕人,會受比較輕嘅鞭打。上帝多俾邊個,就向邊個多取;多付託邊個,就向邊個多要。」

分裂嘅原因

49 「我嚟要將火丟喺地上,倘若已經燒着,唔係我所願意嘅咩!

50 我有當受嘅洗。重未成就前,我係何等迫切呢!

51 你哋唔好以為我係帶和平到世界嚟。我話你哋知,我並唔係帶嚟和平,係帶嚟分裂。

52 從今以後,五口之家將要紛爭,三個同兩個爭,兩個同三個鬥。

53 父同仔爭,仔同父鬥;母同女爭,女同母鬥;家婆同媳婦爭,媳婦同家婆鬥。」

分辨時代嘅預兆

54 耶穌又對羣眾話:「你哋睇見西邊有雲起,就話:『快落雨喇』,果然係。

55 南風一吹,你哋就話:『天氣燥熱喇』,果然又係。

56 偽善嘅人呀!你哋會分辨天色,點解唔會分辨呢嗰時代呢?」

同對頭和解

57 「你哋點解唔自己判斷乜嘢係合宜嘅事?

58 假如有人控告你,將你拉上法庭,你應該盡你所能,趁住重喺路上時同佢和解,免致佢將你交俾法官,法官將你交俾法警,法警將你關入監獄。

59 我話你知,除非等到你繳清罰款嘅最後一分錢,你係不能從監獄出嚟。」