路加福音 17
論罪1 耶穌向佢嘅門徒話:「使人犯罪嘅事係必然會有嘅,但係造成此事嘅人有禍咯!
2 佢倒不如拎大磨石掛喺頸上,沉落海;重好過佢使小子之一犯罪。
3 你哋要謹慎!若你嘅兄弟犯罪,勸戒佢;若佢悔改,饒恕佢。
4 若佢喺一日內得罪你七次,每一次都回頭對你話:『我悔改喇』,你都要饒恕佢。」
論信5 使徒對主話:「請俾我哋更大嘅信心。」
6 主話:「你哋若有信心好似一粒芥菜種,就可以對呢樖桑樹話:『連根拔起,去種喺海中!』佢亦會聽從你哋。」
僕人嘅責任7 「你哋中有個種田或看羊嘅僕人,從農場返嚟,你會唔會對佢話:『 快坐低食飯』呢?
8 當然唔會!你會對佢話:『先替我預備晚飯,綁上圍裙,伺候我,等我飲食完,你致食。』
9 僕人照主人嘅吩咐做,唔通主人會多謝佢咩?
10 你哋都係一樣。當你哋做完上帝吩咐你哋做嘅一切,就話:『我哋係無用嘅僕人;我哋所做嘅不過盡本分啫。』」
醫好十個痲瘋病人11 耶穌去耶路撒冷途中,經過撒馬利亞同加利利中間嘅地區。
12 佢入去一條村時,有十個痲瘋人迎面而嚟。遠遠企住,
13 高聲叫話:「耶穌老師呀,可憐我哋喇!」
14 耶穌睇見,對佢哋話:「你哋去,俾祭司檢查你哋喇!」佢哋去時就得潔淨。
15 其中一個睇見自己已經好返,連忙轉返嚟,大聲頌讚上帝,
16 又俯伏喺耶穌腳前感謝佢。呢個係撒馬利亞人。
17 耶穌話:「得到醫治嘅有十個人,其他九個喺邊處呢?
18 點解只有呢個外族人返嚟感謝上帝呀?」
19 於是耶穌對佢話:「起身,去喇!你嘅信心醫好你。」
上帝國嘅來臨20 法利賽人嚟問耶穌,想知道上帝國幾時嚟到。耶穌答話:「上帝國嚟到唔係眼所能見嘅。
21 冇人能話:『睇吓,喺呢處!』或者『喺嗰處!』因為上帝國係喺你哋心中!」
22 跟住,佢又對門徒話:「日子將到,你哋渴望能見人子當權之日來臨,但見唔到。
23 有人會對你哋話:『睇吓,喺嗰處!』『睇吓,喺呢處!』你哋唔好出去,亦唔好跟隨佢哋。
24 好似閃電橫掃天空,從天呢邊照射到嗰邊,人子嚟嘅日子亦係噉樣。
25 但佢必須先受好多苦難,被此時代嘅人丟棄。
26 正如挪亞嘅時代,人子嚟嘅日子亦係一樣。
27 嗰時人照常飲食嫁娶,直到挪亞入去方舟嗰日,洪水嚟到,將佢哋消滅。
28 人子嚟嘅日子,又好似羅得時代嘅人又飲又食,買賣如常,又耕種又建造。
29 到羅得離開所多瑪嗰日,火同硫磺從天降落,將佢哋消滅。
30 人子顯現嘅日子亦係噉樣。
31 當嗰日,喺屋頂嘅,唔好落嚟入屋裏拎佢嘅嘢;同樣,喺田野工作嘅,亦唔好返去。
32 要記住羅得嘅妻嘅遭遇!
33 凡想救自己生命嘅,就喪失生命;凡喪失生命嘅,就保全生命。
34 我話你哋知,嗰晚,兩個人瞓喺一張床,一個被帶走,一個留低;
35 兩個女人同埋推磨,一個被帶走,一個留低。
36 門徒問話:「主呀,此事會喺邊處發生呢?」耶穌答話:「屍首喺邊處,鷹亦聚埋嗰處。」
37 拼於上節