路加福音 19
耶穌同撒該1 耶穌入耶利哥城,要從嗰個城經過。
2 當地有一個稅務長,名撒該,係個好有錢嘅人。
3 撒該好想睇吓耶穌係點樣嘅人,但係佢身材矮小,喺人羣中無法睇到耶穌。
4 於是佢行前,爬上一樖桑樹,要睇吓耶穌,因為耶穌要從呢條路經過。
5 耶穌走到嗰處,抬頭望撒該,對佢話:「撒該,快啲落嚟!今日我要住喺你家中。」
6 撒該急忙落嚟,非常高興接待耶穌。
7 眾人睇見都譏彈話:「呢個人居然到罪人嘅屋住宿!」
8 撒該企起身對主話:「主呀,我將我財產嘅一半分過窮人;我欺詐過邊個,我就還佢四倍。」
9 耶穌對佢話:「今日救恩嚟到呢一家,因為此人同樣係亞伯拉罕嘅子孫。
10 人子嚟係要尋找拯救迷失嘅人。」
僕人同金幣嘅比喻11 眾人正在聽呢啲話,耶穌又向佢哋講另一個比喻。嗰時,耶穌快到耶路撒冷,佢哋以為上帝國快要顯現。
12 耶穌話:「有一個貴族去遠方,想被封為王,然後返嚟。
13 動身以前,佢將十個僕人召嚟,每人俾一個金幣,話:『我唔喺處時,你哋拎呢啲錢去做生意,睇吓能賺幾多。』
14 佢本國嘅人一向恨佢,打發使者跟住去話:『我哋唔想此人做我哋嘅王。』
15 貴族被封為王返嚟以後,立刻命令嗰啲領過金幣嘅僕人到佢面前,想知道佢哋每人做生意賺得幾多。
16 頭一個上嚟話:『主人,我用你嗰個金幣賺咗十個金幣。』
17 主人話:『好!你係個好僕人;你既然喺小事上可靠,我委派你管理十座城。』
18 第二個僕人上嚟話:『主人,我用你嗰個金幣賺咗五個金幣。』
19 主人對佢話:『你亦可以管五座城。』
20 又有一個僕人上嚟話:『主人,你嘅金幣喺呢處;我用手巾包住擠好。
21 我一向怕你,因為你係個嚴厲嘅人。唔屬於你嘅,你要拎走;未有種嘅,你要收割。』
22 主人對佢話:『你呢個惡僕!我要用你自己嘅話定你嘅罪!既然你知道我係嚴厲嘅人,拎走唔屬於我嘅,收割我未有種嘅,
23 你點解唔將我嘅錢存入銀行,等我返嚟時,可以連本帶利收返呢?』
24 於是對旁邊企處嘅人話:『將佢嘅金幣拎過嚟,俾嗰個有十個金幣嘅僕人!』
25 佢哋對佢話:『主人,佢已經有十個金幣喇!』
26 主人話:『我話你哋知,但凡有嘅,要俾佢更多;冇嘅就連佢所有嘅都要奪去。
27 至於嗰啲敵人唔想我做佢哋嘅王嘅,將佢哋帶嚟,喺我面前殺咗佢哋!』」
耶穌騎驢入耶路撒冷28 講完呢啲話,耶穌就喺前面行,上耶路撒冷。
29 快到伯法其同伯大尼、向住橄欖山去時,耶穌打發兩個門徒先行,
30 吩咐佢哋話:「你哋去前面一條村,入去時,會睇見一匹從來未有人騎過嘅驢仔綁喺嗰處。你哋將佢解開,拉到呢處嚟。
31 若有人問你哋點解解開驢仔,你哋就話:『主要用佢。』」
32 佢哋去後,所遇見嘅正如耶穌話佢哋知嘅一樣。
33 當佢哋解開驢仔時,驢嘅主人問佢哋:「你哋點解解開驢仔呢?」
34 佢哋答話:「主要用佢。」
35 然後佢哋將驢仔拉到耶穌面前,將自己嘅衣服搭喺驢仔背上,扶住耶穌騎上去。
36 耶穌前行時,眾人拎自己嘅衣服鋪喺路上。
37 當佢靠近耶路撒冷、快要從橄欖山斜坡落去時,門徒因所見過嘅一切奇蹟就感謝上帝,大聲歡呼:
38 「願上帝賜福俾嗰位奉主名嚟嘅君王;天上有和平,榮耀歸於上帝!」
39 眾人中有幾個法利賽人對耶穌話:「老師,吩咐你嘅門徒安靜喇!」
40 耶穌答話:「我話你哋知,佢哋若唔出聲,呢啲石都會呼叫起嚟。」
為耶路撒冷哀哭41 耶穌快到耶路撒冷時,睇見嗰個城,就為佢哀哭,
42 話:「願你今日知有關你平安嘅事,但係你現今睇唔見。
43 日子就嚟,嗰時你嘅仇敵將造土壘包圍你,從四面困住你。
44 佢哋將徹底消滅你同你城牆裏嘅人民,唔留一石喺另一石上,因為你唔知道眷顧你嘅時候呀。」
潔淨聖殿45 耶穌入聖殿,將做買賣嘅人趕出去,
46 對佢哋話:「聖經有話:『我嘅聖殿要做禱告嘅殿。』你哋反使佢成為賊巢!」
47 耶穌每日喺聖殿教導人。祭司長、經學教師,同民間嘅領袖都想殺佢,
48 但唔知道點樣落手;因為羣眾都喜歡聽佢,注意佢講嘅每一句話。