路加福音 2
耶穌誕生1 嗰時,羅馬皇帝亞古士督頒佈命令,要羅馬帝國嘅人民辦理戶口登記。
2 此首次嘅戶口登記係喺居里扭做敘利亞總督時舉行。
3 眾人都回去本鄉辦理登記。
4 約瑟亦從加利利省嘅拿撒勒城去猶太,到大衛嘅城,伯利恆;因為約瑟屬大衛嘅宗族,
5 佢同佢已訂婚嘅馬利亞一齊登記。馬利亞已經懷孕,
6 當佢哋喺伯利恆時,佢嘅產期到咗。
7 就生個長子,用布包住,放喺馬槽,因為客棧冇地方俾佢哋住。
牧羊人同天使8 喺伯利恆野外有牧羊人,夜間輪流看守羊羣。
9 主嘅天使向佢地顯現;主嘅榮光四面照住佢哋,佢哋非常驚慌。
10 天使對佢哋話:「唔使怕!我有大喜嘅消息話你哋知;係關於萬民嘅。
11 今日,喺大衛城裏,為你哋生個救主,即係主基督!
12 你哋將見一嬰孩,俾布包住,瞓喺馬槽;呢啲就係記號咯。」
13 忽然,有大隊天軍同嗰位天使,讚美上帝話:
14 「願榮耀歸於至高之處嘅上帝;願和平歸於地上佢所喜愛嘅人。」
15 天使離開佢哋上天,牧羊人彼此話:「我哋去伯利恆城,睇所成就嘅,即係主所指示過我哋嘅。」
16 於是佢哋趕快去,搵到馬利亞同約瑟,又見個嬰孩瞓喺馬槽。
17 牧羊人睇見之後,就將天使所講關於嬰孩嘅事傳開。
18 聽聞嘅人對牧羊人嘅話都覺得好詫異。
19 但係馬利亞將呢一切事存喺心,反覆思想。
20 牧羊人返去,為佢哋所聽聞所睇見嘅事讚美歌頌上帝,因為所發生嘅事都係依照天使對佢哋所講嘅。
改名耶穌21 滿一星期,嬰兒行割禮嘅日子到,就改佢名做耶穌;此名係佢未成胎前天使替佢改嘅。
奉獻俾主22 按照摩西律法規定,潔淨日期滿以後,約瑟同馬利亞帶嬰兒上耶路撒冷,將佢奉獻俾主。
23 呢個係依照主嘅律法所寫嘅:「頭胎嘅男子要稱聖歸主。」
24 佢哋又依照主嘅律法所規定,獻上一對斑鳩或兩隻鴿仔做祭物。
25 當時,喺耶路撒冷有個人,名叫西面。佢係敬畏上帝嘅義人,常時盼望以色列得到拯救。聖靈與佢同在;
26 佢得到聖靈啟示,知道自己喺離世以前會睇見主所應許嘅基督。
27 由於聖靈嘅感動,佢嚟到聖殿。嗰時,耶穌嘅父母剛抱住嬰兒耶穌入嚟,想照律法嘅規定去做。
28 西面用手接佢過嚟,頌讚上帝話:
29 「主呀,你已經實現你嘅應許;現今可以俾你嘅僕人平安返去。
30 我已經親眼睇見你嘅拯救,
31 係你為萬民所預備嘅:
32 佢將成為啟示異邦嘅亮光,成為你子民以色列嘅榮耀。」
33 嬰兒嘅父母對西面所講關於嬰兒嘅事覺得驚奇。
34 西面祝福佢哋,並向嬰兒嘅母親馬利亞話:「此嬰兒被上帝揀選,使以色列中好多人滅亡,好多人得救。佢要成為好多人毀謗嘅對象,
35 因此揭露多人心裏嘅意念。憂傷要好似利劍刺透你嘅心。」
36 有個女先知,名叫亞拿,係亞設支派法內力嘅女。佢已經老邁,曾經結婚,同丈夫一齊生活七年,
37 以後做寡婦獨自居住,已經寡居八十四年。佢冇離開過聖殿,日夜敬拜上帝,禁食、禱告。
38 正在嗰時,佢亦入嚟,頌讚上帝,並向所有盼望上帝嚟救贖耶路撒冷嘅人宣講呢個嬰兒嘅事。
返去拿撒勒39 約瑟同馬利亞照主嘅律法做完一切所規定嘅事,就返去加利利,到佢哋嘅本鄉拿撒勒。
40 個嬰兒漸漸長大,強壯而有智慧;上帝嘅恩寵與佢同在。
孩童耶穌喺聖殿41 耶穌嘅父母每年上耶路撒冷守逾越節。
42 耶穌十二歲時,佢哋照常去守節。
43 守完節期,佢哋返去,但孩童耶穌逗留喺耶路撒冷;佢父母唔知呢件事,
44 以為佢喺同行嘅人羣中,走咗一日嘅路程喺親友中揾佢,
45 揾唔到,就返去耶路撒冷再揾。
46 第三日,佢哋喺聖殿裏揾到佢。佢正坐喺猶太教師中,一面聽一面問;
47 所有聽聞佢嘅人都驚奇佢聰明嘅對答。
48 佢嘅父母睇見,就見出奇。佢母親對佢話:「仔呀,點解你噉樣待我哋呢?你父親同我非常焦急,到處揾你呀!」
49 耶穌答話:「點解揾我?唔通你哋唔知我必須喺我父嘅屋〈或譯:關心我父嘅事〉咩?」
50 但係佢哋都唔明白佢呢啲話嘅意思。
51 於是,耶穌同佢哋返去拿撒勒城,樣樣都順從佢哋。佢母親將呢一切嘅事存記喺心。
52 耶穌嘅身體同智慧一齊增長,深得上帝同人嘅喜愛。