Library · yue

提摩太後書 1

1 我保羅;奉上帝嘅旨意做基督耶穌嘅使徒,嚟宣佈佢透過基督耶穌所應許嘅新生命。

2 我寫信俾你-我親愛嘅仔提摩太:願父上帝同我哋嘅主基督耶穌賜恩典、憐憫、平安俾你!

多謝同鼓勵

3 我感謝上帝,係我同祖宗一樣用清白嘅良心所敬拜嘅上帝。我不停喺禱告中記念你,

4 想起你喺惜別時流嘅眼淚,我就急切想見你;見到你,我就會滿心快樂。

5 我記得你真純嘅信心,係你外祖母羅以同你母親友尼基所有嘅。我相信你亦有,

6 所以,提醒你:喺我為你按手時上帝所賜俾你嘅恩賜,你要使佢好似燃燒唔熄嘅火。

7 因為,上帝賜俾我哋嘅靈唔會使我哋膽怯;佢嘅靈使我哋充滿力量、愛心,同自制。

8 你唔好將為我哋嘅主作證當做一件羞恥嘅事,亦唔好因我為主嘅緣故成為囚犯而覺羞恥。你要按照上帝所賜嘅力量,為福音分擔苦難。

9 上帝拯救我哋,呼召我哋做佢嘅子民,唔係因為我哋有乜嘢好行為,係出於佢嘅旨意同恩典。佢喺萬世以前就透過基督耶穌將此恩典賜俾我哋,

10 現今由於我哋嘅救主基督耶穌嘅降臨而實現。基督己經毀滅死亡嘅權勢,透過福音將唔會朽壞嘅生命彰顯出嚟。

11 為此福音,上帝指派我做傳道者、使徒,同教師。

12 為噉,我受此苦難。但,我仍然滿懷確信;因為我知我所信靠嘅係邊個,亦深信佢能保守佢所託付我嘅,直到主再來嘅日子。

13 你要堅守我傳俾你正確嘅信息,作為你嘅規範,亦要守住我哋在基督耶穌得到嘅信心同愛心。

14 我哋所託付俾你嘅真道,你要倚賴住在我哋心中嘅聖靈嚟保守。

15 你知道,喺亞西亞省嘅人都離棄我,包括腓吉路同黑摩其尼。

16 願主憐憫阿尼色弗一家;因為佢多次鼓勵我,使我精神愉快。佢唔因我做囚犯而覺羞恥,

17 佢到羅馬就四處搵我,終於搵到。

18 願主使佢喺主再來嘅日子得到憐憫!至於佢喺以弗所為我做嘅好多事,你係清楚知道嘅。