提摩太後書 3
世界嘅末期1 你要知道,世界嘅末期會有種種苦難。
2 嗰時,人只顧自己、貪財、自誇、狂傲、毀謗、忤逆父母、忘恩負義、唔聖潔、
3 冇親情、殘忍、散播謠言、蠻橫、兇暴、恨惡良善。
4 佢哋出賣師友,任意妄為,狂妄自大,愛享樂過於愛上帝。
5 佢哋有敬虔嘅外貌,但背棄敬虔嘅實質。呢一類人,你哋要躲避。
6 佢哋中有人穿門入戶,到人家中,迷惑意志薄弱、被罪過壓制、被各種慾望支配嘅婦女。
7 此婦女雖然常時想學習,但不能認識真理。
8 好似從前雅尼同佯庇點樣反對摩西,呢啲人照樣反對真理。佢哋心思敗壞,係信仰上經唔起考驗,
9 再發生唔到乜嘢作用;因為佢哋嘅愚昧會喺眾人面前暴露無遺,正如雅尼同佯庇一樣。
最後嘅指示10 但你已經接受我嘅教訓同人生觀,放法我嘅行為、信心、寬容、愛心、忍耐,
11 並分擔所受嘅迫害同痛苦。我喺安提阿、以哥念、路司得所遭遇、所忍受嘅迫害,你都知道;但主救我脫離呢一切。
12 凡立志跟從基督耶穌、過敬虔生活嘅人,都會遭受迫害。
13 邪惡嘅人同騙子嘅處境亦會一日比一日壞;佢哋呃人,自己亦被人呃。
14 你要持守你所接受同確信嘅真理。你知道邊個係你嘅導師;
15 你亦記得你從細就明白聖經,係俾你智慧、指引你因信基督耶穌而獲得拯救嘅智慧。
16 受上帝靈感而寫嘅每一卷聖經,對於教導真理、指責謬誤、糾正過錯、指示人生正路,都有益,
17 使事奉上帝嘅人得到充分嘅準備,能做各樣善事。