希伯來書 3
耶穌超越摩西1 被上帝選召聖潔嘅兄弟呀!你哋應該思想耶穌;佢係上帝打發嘅使者,我哋信仰宣認嘅大祭司。
2 佢對選召佢嚟工作嘅上帝忠心,好似摩西為上帝全家忠心工作一樣。
3 起屋嘅人得嘅榮耀超過佢起嘅屋。同樣,耶穌比摩西得到更多嘅榮耀。
4 每一間屋都係人造嘅,但係上帝創造萬物。
5 摩西喺上帝嘅全家做忠心嘅僕人,為上帝將來要講嘅話做證。
6 但係,基督以仔嘅身分忠心管理上帝嘅家。若我哋堅持所盼望嘅,有勇氣,有信念,我哋就係上帝家嘅人。
上帝子民嘅安息7 所以,好似聖靈所講嘅:今日,若你哋聽見上帝嘅話,
8 就唔好頑固,好似從前背叛上帝,喺曠野試探佢一樣。
9 上帝話:雖然四十年中,你哋嘅祖宗曾睇見我嘅作為,佢哋仍試探我,考驗我。
10 所以,我向嗰個時代嘅人發嬲;話:佢哋唔忠心,又違背我嘅命令。
11 我喺忿怒中發誓:佢哋永遠不能享受我所賜嘅安息!
12 兄弟呀!你哋要謹慎,免至你哋中有人心思敗壞,唔肯信,離棄永生嘅上帝。
13 但,為避免你哋中有人被罪迷惑,心腸剛硬,你哋要趁住重有所謂「今日」時,日日互相勸勉。
14 若我哋能堅持當初嘅信念,始終唔變,我哋就係基督嘅同工。
15 聖經話:今日,若你哋聽見上帝嘅話,你哋唔好頑固,好似從前背叛上帝一樣。
16 邊個聽見上帝嘅話又背叛佢呢?豈唔係摩西從埃及帶領出嚟嘅人民咩?
17 喺嗰四十年,上帝向邊個發嬲呢?豈唔係嗰啲犯罪而喺曠野倒斃嘅人民咩?
18 當上帝發誓話:「佢哋不能享受我俾佢哋嘅安息」,呢啲係向邊個講嘅呢?豈唔係向嗰啲背叛嘅人民講嘅呢?
19 噉樣睇嚟,佢哋不能享受安息係因為佢哋唔信。