希伯來書 9
地上同天上嘅崇拜1 前約有崇拜嘅規例同人造嘅聖所。
2 造好嘅聖幕,外層叫做聖所,裏面有燈臺、几及餅。
3 第二層帳幔後嘅帳幕叫做至聖所,
4 裏面有燒香用嘅金香壇同整個用金包住嘅約櫃,櫃裏放住裝嗎哪嘅金樽,又有亞倫發過芽嘅杖同兩塊約版。
5 約櫃上有基路伯,象徵上帝嘅同在;基路伯嘅翅膀遮住赦罪嘅座位。關於此事現今不能詳細講明。
6 呢啲物件係噉樣安排。祭司每日到聖幕嘅外層舉行崇拜儀式;
7 只有大祭司入去聖幕嘅內層,每年亦只有一次,每次要帶住血入去,為自己同人民因無知而犯嘅罪獻俾上帝。
8 聖靈透過呢啲安排指明,只要外層嘅帳幕仍然存在時,嗰條通去至聖所嘅路就唔開放。
9 外層嘅帳幕預表現今。即係話獻俾上帝嘅禮物同祭品都不能使敬拜嘅人內心完全。
10 呢啲只係牽涉到飲食及唔同嘅潔淨儀式,係屬於外表嘅條例;佢哋嘅功效到上帝改革一切時為止。
11 但基督已經嚟做大祭司,實現嗰啲美事。佢嘅帳幕更大,更完全,唔係人手造嘅;即係話,唔係被造嘅世界嘅一部份。
12 基督只有一次入去至聖所,佢並冇用山羊同小牛嘅血做祭物,係用佢自己嘅血為我哋成就永遠嘅救贖。
13 若將山羊同公牛嘅血,及焚燒母牛嘅灰,灑喺禮儀上唔潔淨嘅人身上,能清除佢哋嘅污穢,使佢哋乾淨,
14 基督嘅血能成就嘅豈唔係更多咩?透過永恆嘅靈,佢將自己當做無瑕庛嘅祭物獻俾上帝。佢嘅血能潔淨我哋嘅良心,除去我哋嘅腐敗行為,使我哋能事奉永活嘅上帝。
15 為噉,基督成為新約嘅中保,使上帝所呼召嘅人能領受佢應許永遠嘅福。透過受死;釋放佢哋喺前約時犯嘅罪。
16 所有遺囑必須等到立遺囑嘅人死咗;
17 因為立遺囑嘅人若仍然在生,遺囑就冇功效,只喺佢死後,遺囑至能生效。
18 所以,連前約亦係用血訂立致生效。
19 當初,摩西照律法先將所有嘅誡命傳俾人民,然後拎小牛同山羊嘅血,共水,用深紅色嘅絨同牛膝草,灑喺律法書上同所有嘅人民身上。
20 佢話:「呢啲血印證上帝命令你哋遵守嘅約。」
21 同樣,摩西亦將血灑喺帳幕及崇拜同禮儀上用嘅各樣器皿上。
22 依律法,幾乎各樣器皿都係用血嚟潔淨;冇流血,就冇赦罪。
23 呢啲仿照天上嘅樣式造嘅器皿,必要用此方法潔淨。但係,天上嘅器皿必要用更好嘅祭物來潔淨。
24 基督並冇入去人手造嘅聖所;嗰個不過係真聖所嘅副本。佢上到天,替我哋企喺上帝面前。
25 猶太人嘅大祭司每年帶住牲畜嘅血入去至聖所。但基督毋須多次獻上自己,
26 若係噉,從創世以來,佢就要多次忍受苦難。但現今基督喺末世一次顯現,將自己當做祭物獻上,除去罪惡。
27 依照定命,人人必有一死,死後有上帝嘅審判。
28 同樣,基督亦一次獻上,除去多人嘅罪。佢將再一次顯現,唔係嚟對付罪,而係嚟拯救等候佢嘅人。