彼得後書 2
偽先知1 從前有偽先知喺以色列民間出現;將來亦有偽教師喺你哋中出現。佢哋私自引入陷害人嘅異端,唔承認救贖佢哋嘅主,自取急速嘅滅亡。
2 好多人會隨從佢哋邪蕩嘅行為,以致真理因佢哋嘅緣故遭受毀謗。
3 此偽先知為滿足自己嘅貪心,用捏造嘅故事向你哋搾取財物。自古以來,上帝嘅審判等住呢種人;佢哋嘅滅亡亦必快到!
4 上帝唔寬容犯罪嘅天使,曾將佢哋扔入地獄,喺黑暗坑裏,等候審判。
5 上帝亦唔寬容好耐以前嘅世代,曾用洪水淹沒嗰啲心目中冇上帝嘅人,淨係拯救傳揚正義嘅挪亞一家八口。
6 上帝懲罰所多瑪同蛾摩拉兩城,降火燒毀,作為唔信嘅人嘅鑑戒。
7 佢搶救好人羅得;佢為壞人嘅淫亂行為大憂傷。
8 嗰個好人住喺壞人中,日日睇見,聽見嗰啲邪惡嘅事,心就非常痛苦。
9 主知道點樣拯救敬虔嘅人脫離試煉,亦知道點樣留低壞人,尤其係嗰啲放縱肉體情慾、藐視上帝權威嘅人,等喉審判日懲罰佢哋。呢班偽教師膽大妄為,唔單只唔尊敬天上嘅尊榮者,反而侮辱佢哋;
10 連嗰啲能力強過呢班偽教師嘅天使亦唔用侮辱嘅話喺主前控告佢哋。
11 拼於上節
12 但呢班人好似野獸,生嚟就係被捕捉屠殺嘅;佢哋憑本能行動,毀謗自己唔知嘅事。佢哋好似野獸一樣被毀滅。
13 佢哋製造苦難,必然自食其果。對佢哋嚟講,所謂快樂就係喺光天白日之下做滿足肉體慾望嘅事。佢哋同你哋同檯食飯,其實係你哋嘅羞恥同污辱,因為佢哋始終以詭詐為樂!
14 佢哋好色嘅眼專睇淫婦,犯罪嘅慾望從來得唔到滿足。佢哋誘惑軟弱嘅人;心習慣貪心;係被上帝咒詛嘅!
15 佢哋離開正路,走入歧途,同比珥嘅仔巴蘭走同一條路,巴蘭貪愛不義之財,
16 因自己犯嘅罪受責備。嗰隻唔會講話嘅驢竟然發出人嘅聲,阻止先知狂妄嘅行為。
17 呢啲人好似乾嘅泉源,暴風吹散嘅雲霧;上帝已經為佢哋喺黑暗嘅深淵留咗地方。
18 佢哋講狂傲愚蠢嘅話,用肉體嘅情慾誘惑正在逃脫狂妄行為嘅人。
19 佢哋答應俾人自由,但自己做腐敗生活嘅奴隸;因為人俾乜嘢控制住,就係乜嘢嘅奴隸。
20 若人因認識我哋嘅主─救主耶穌基督,從世界腐敗嘅勢力逃脫出嚟,以後又被捉返去,被制伏,呢種人嘅結局比先前嘅更壞。
21 佢哋知道有正義嘅道路,竟然又離開佢哋所承受神聖嘅命令;呢種人不如唔知道有正義嘅道路重好。
22 俗語話,佢哋嘅情況好似:「狗返轉頭食佢吐出嚟嘅嘢」;或係:「豬洗乾淨,又轆返落泥湴裏。」