Library · yue

路加福音 5

耶穌呼召門徒

1 有一次,耶穌企喺革尼撒勒湖邊,人羣逼住佢,要聽佢宣講上帝嘅話。

2 佢睇見兩隻船停喺湖邊,打魚嘅人離開船,正喺岸上洗網。

3 耶穌上咗西門嗰隻船,吩咐西門將船撐開,離岸幾步。耶穌坐落,從船上教導羣眾。

4 講完之後,佢對西門話:「開船到水深嘅地方,然後你同你同伴撒網攞魚。」

5 西門話:「老師,我哋成晚勞力,乜嘢都攞唔到;但聽你話,我就撒網!」

6 於是佢哋撒網,圍住一大羣魚,魚網差啲破裂。

7 佢哋就打手勢,招呼另一隻船嘅同伴過嚟幫忙。佢哋嚟,將魚裝滿兩隻船,令到船幾乎沉。

8 西門彼得睇見,就跪喺耶穌面前,話:「主呀,請你離開我,我係個罪人!」

9 佢同同伴見張網所圍到嘅魚都好驚奇。

10 佢嘅同伴西庇太嘅仔雅各同約翰都係一樣驚奇。耶穌對西門話:「唔使怕,從今以後,你要得人咯。」

11 佢哋將船靠岸,放下所有嘅,跟從耶穌。

耶穌醫好痲瘋病人

12 有一次,耶穌喺一個城,有個全身痲瘋嘅病人。佢見耶穌,就俯伏喺佢面前求佢話:「主呀,只要你肯,你能使我潔淨!」

13 耶穌伸手摸佢,話:「我肯,你潔淨咯!」佢嘅痲瘋立刻消除。

14 耶穌吩咐佢話:「唔好話俾人知,只要去見祭司,等佢替你檢查;然後按照摩西嘅規定獻上祭物,向眾人證實你已經潔淨。」

15 於是,耶穌嘅名聲越發傳開。一大羣人聚集,要聽佢講道,同時希望佢哋嘅疾病得到醫治。

16 但耶穌退到僻靜嘅地方禱告。

耶穌醫好瘋癱病人

17 有一日,耶穌正喺處教導人,有啲從加利利各鄉鎮同猶太、耶路撒冷嚟嘅法利賽人同經學教師亦坐喺旁邊。主嘅能力與耶穌同在,使佢能醫好病人。

18 有幾個人抬一個瞓喺床上嘅瘋癱病人嚟,想法子將佢抬入屋裏,放喺耶穌面前。

19 但係,因為人多,佢哋冇法抬佢入去,就將佢抬上屋頂,拆開瓦片,連人帶床將佢吊落去,放喺人羣中耶穌嘅面前。

20 耶穌睇見佢哋嘅信心,就對嗰個瘋癱病人話:「朋友,你嘅罪得赦免咯。」

21 嗰啲經學教師同法利賽人議論話:「此人係邊個?竟講出呢種狂妄嘅話!除上帝之外,邊個有赦罪嘅權柄呢?」

22 耶穌睇穿佢哋噉樣議論,就對佢哋話:「你哋心中點解噉樣想呢?

23 對病人話『你嘅罪得赦免』容易呢?抑或係『起身行』容易呢?

24 我要你哋知,人子喺地上有赦罪嘅權。」於是佢對瘋癱病人話:「我吩咐你,起身,拎你張床,返歸喇!」

25 嗰個人立刻當住眾人面前起身,拎自己所瞓嘅床返去,頌讚上帝。

26 眾人都非常驚奇,滿懷敬畏頌讚上帝話:「今日我哋睇到不可思議嘅事!」

耶穌呼召利未

27 此事以後,耶穌出去,睇見一個收税嘅人名利未,坐喺税關。耶穌對佢話:「嚟跟從我!」

28 利未就起身,放低所有嘅,跟從耶穌。

29 利未喺自己家中為耶穌舉行盛大宴會;好多税吏同其他嘅人都嚟參加。

30 有啲法利賽人同屬佢哋一派嘅經學教師向耶穌嘅門徒埋怨話:「你哋點解同税吏及罪人一齊飲食呢?」

31 耶穌對佢哋話:「健康嘅人唔使睇醫生,有病嘅人致要睇佢。

32 我嚟嘅目的唔係要叫義人,而係要叫罪人悔改。」

禁食嘅問題

33 有人對耶穌話:「約翰嘅門徒成日禁食禱告,法利賽人嘅門徒亦係一樣,只有你嘅門徒又飲又食。」

34 耶穌話:「新郎重喺婚宴時,你能叫賀喜嘅客人禁食咩?當然不能!

35 但係日子將到,新郎從佢哋之中被帶走,嗰時,佢哋就禁食咯。」

36 耶穌又對佢哋講另一個比喻話:「冇人撕爛新衣服,將撕落嚟嗰塊布補喺舊衣服上;若噉樣做,新衣服撕爛咗,撕落嚟嘅嗰塊新布又不能同舊布相稱。

37 亦冇人拎新酒裝喺舊皮袋裏;若噉樣做,新酒會脹破皮袋,酒漏出嚟,皮袋亦損壞。

38 新酒必須裝喺新皮袋裏。

39 冇人飲過舊酒之後,再想飲新酒,佢總係話舊酒好。」