Library · yue

路加福音 6

安息日嘅問題

1 有一個安息日,耶穌經過麥田;佢嘅門徒摘啲麥穗,用手搓嚟食。

2 有法利賽人睇見,話:「你哋點解做安息日唔准做嘅事呢?」

3 耶穌答話:「大衛同佢嘅隨從喺肚餓時所做嘅事,你哋冇讀過咩?

4 佢走入上帝聖殿,拎獻俾上帝嘅餅嚟食,又俾佢嘅隨從食;呢啲餅,除祭司以外,任何人食都算係違法嘅。」

5 於是耶穌話:「人子係安息日嘅主。」

醫好手枯乾嘅病人

6 另一個安息日,耶穌到會堂教導人,嗰處有一個人,佢嘅右手枯乾。

7 有啲經學教師同法利賽人想搵耶穌嘅錯處,嚟控告佢,因此喺旁邊窺探,睇耶穌喺安息日醫唔醫病。

8 耶穌知佢哋嘅意念,就對嗰個手枯乾嘅病人話:「起身,企到前面嚟!」嗰個人就起身企喺處。

9 於是耶穌對佢哋話:「我問你哋,關於安息日,我哋嘅律法係點樣規定?做好事,抑或做壞事?救命,抑或害命?」

10 佢睇吓周圍所有嘅人,然後對嗰個人話:「將手伸直!」嗰個人一伸,手就復原。

11 佢哋非常憤怒,彼此商量點樣嚟對付耶穌。

耶穌揀選十二使徒

12 有一日,耶穌上山,成晚祈禱上帝。

13 天光時,佢召集門徒到佢面前,從佢哋中揀選十二人,稱佢哋做使徒。

14 佢哋係西門〈耶穌又替佢改名彼得〉同佢嘅細佬安得烈,雅各同約翰,腓力同巴多羅買,

15 馬太同多馬,亞勒腓嘅仔雅各同被稱為激進黨徒嘅西門,

16 雅各嘅仔猶大同後來出賣耶穌嘅加略人猶大。

耶穌嘅教訓同醫治

17 耶穌同使徒一齊落山;佢同好多門徒一齊企喺平地,一大班羣眾從猶太全地、耶路撒冷同沿海城市推羅、西頓等地集合到嗰處,

18 想聽佢講道,亦盼望佢醫好佢哋嘅疾病。嗰啲被污靈困擾嘅亦嚟,並且得到醫治。

19 眾人都想摸佢,因為有能力從佢身上出嚟,醫好佢哋。

喜樂同憂傷

20 耶穌轉向佢嘅門徒,對佢哋話:「貧窮嘅人有福咯,你哋係上帝國嘅子民!

21 現今飢餓嘅人有福咯,你哋將得飽足!現今哭泣嘅人有福咯,你哋將要歡笑!

22 為人子嘅緣故,有人懷恨你哋,棄絕你哋,侮辱你哋,將你哋當做邪惡嘅,你哋就有福咯!

23 以前佢哋嘅祖宗亦係噉對待先知。喺嗰日,你哋要歡喜到跳,因為喺天上將有豐富嘅賞賜為你哋保存。

24 富有嘅人有禍咯!因為你哋已經享夠安樂!

25 現今飽足嘅人有禍咯!因為你哋將要飢餓!現今歡笑嘅人有禍咯!因為你哋將要哀慟哭泣!

26 眾人稱讚你哋時,你哋有禍咯!因為佢哋嘅祖宗對偽先知亦曾經講過同樣嘅話。」

論愛仇敵

27 「但係,你哋聽我話嘅,我話你哋知,要愛你哋嘅仇敵,厚待憎惡你哋嘅;

28 為咒詛你哋嘅人祝福,為侮辱你哋嘅人禱告。

29 有人打你一邊面,連另一邊亦俾佢打!有人拎走你外衣,連內衣亦俾佢!

30 邊個對你有所要求,就俾佢;有人拎走你嘅嘢,就唔好去攞返嚟。

31 你哋想人哋點樣待你哋,你哋亦要點樣待佢哋。

32 假如你哋只愛嗰啲愛你哋嘅人,有乜嘢功德呢?連罪人亦愛嗰啲愛佢哋嘅人!

33 假如你哋只善待嗰啲善待你哋嘅人,有乜嘢功德呢?連罪人亦會噉做!

34 假如你哋只借錢俾有希望償還嘅人,又有乜嘢功德呢?連罪人亦借錢俾罪人,只係要如數收回!

35 你哋要愛仇敵,善待佢哋;借錢俾人,唔期望收返。噉樣,你哋將得到豐富嘅賞賜,而且將成為至高者嘅仔女,因為佢亦以仁慈待嗰啲忘恩負義同邪惡嘅人。

36 你哋要仁慈,正如你哋嘅父仁慈一樣。」

唔好論斷別人

37 「唔好論斷人,上帝就唔審斷你哋;唔好定人嘅罪,上帝就唔定你哋嘅罪;要饒恕人,上帝就饒恕你哋。

38 施與人哋,上帝就會施與你哋,並且用大升斗,㓤落去,㓤到實,滿到流俾你哋。你哋用乜嘢量器量俾人,上帝亦用同樣嘅量器量返俾你哋。」

39 耶穌又對佢哋講一個比喻,話:「盲眼人不能領盲眼人走路;若係噉,兩個都會跌落坑。

40 學生不能高過老師,佢學成後最多不過好似老師一樣。

41 你點解只睇見你兄弟眼中嘅刺,但唔想到自己眼中有大樑呢?

42 你自己眼中有大樑,點能對你兄弟話:『兄弟,等我除去你眼中嘅刺』呢?偽善嘅人呀,先將你眼中嘅大樑移去,你致能睇得清楚,將兄弟眼中嘅刺挑出嚟。」

樹同果

43 「好樹不能結壞果,壞樹亦不能結好果;

44 樹嘅好壞從佢嘅果可以分辨出嚟。你哋唔會喺荊棘裏摘無花果,亦唔會喺蒺藜中採葡萄。

45 好人從佢心裏積存嘅善發出善;惡人從佢積存嘅惡發出惡。人心裏所充滿嘅,嘴就講出。」

46 「你哋點解稱呼我『主呀!主呀!』但唔實行我吩咐你哋嘅話?

47 我話你哋知,嗰啲到我前,聽我嘅話而去實行嘅,係好似乜嘢人?

48 佢好似一個起屋嘅人,挖深地土,將根基安喺磐石上。洪水氾濫沖擊嗰間屋時,屋唔動搖,因為佢建造得好。

49 但係,嗰啲聽咗我嘅話而唔去實行嘅,好似一個人喺土地上起屋冇立根基,河水一沖,屋立刻冧,造成極嚴重嘅損壞!」