Library · yue

路加福音 8

跟隨耶穌嘅婦女

1 過冇耐,耶穌周圍遊行各城市鄉村,傳上帝國嘅福音;十二個門徒跟佢同行。

2 此外亦有啲婦女,都係曽被邪靈同疾病困擾、已經得醫好嘅;內中有抹大拉嘅馬利亞,從佢身上曽有七個鬼被趕出嚟;

3 又有希律家嘅官員苦撒嘅妻約亞拿,同蘇撒拿,及其他好多婦女。佢哋都用自己嘅財物嚟供給耶穌同佢嘅門徒。

撒種嘅比喻

4 羣眾從各地嚟見耶穌。一大羣人聚集時,耶穌對佢哋講比喻話:

5 「有個撒種嘅人出去撒種。撒嗰時,有啲跌落喺路旁,被人踐踏,飛鳥嚟盡哋食嘥。

6 有啲落喺石地,種子發苗後就枯乾,因為得唔到水分嘅滋潤。

7 有啲落喺荊棘中,荊棘長起嚟,將幼苗擠住。

8 有啲落喺好嘅泥土,發苗,長大結實百倍。」耶穌又話:「有耳可聽嘅,就應當聽!」

比喻嘅目的

9 耶穌嘅門徒嚟問佢呢個比喻嘅意思。

10 佢話:「有關上帝國奧祕嘅知識已經俾過你哋知;若係他人,就要用比喻,致令佢哋睇,睇唔見,聽,聽唔明。」

解釋撒種嘅比喻

11 「呢個比喻嘅意思係噉樣:種子係指上帝嘅道理。

12 落喺路旁嘅種子係指人聽咗道理,魔鬼就嚟,從佢哋心中將信息奪去,免致佢哋因信得救。

13 落喺石地嘅種子係指人聽道理後樂意接受,但係心中冇根;不過一時相信,及至遇到考驗就企立不住。

14 落喺荊棘中嘅種子係指人聽過道理,但生活上嘅憂慮,財富同享樂嘅誘惑,窒息道理嘅生機,不能結出成熟嘅果實。

15 落喺好泥土嘅種子係指人聽過道理,用良善同誠實嘅心持守住,而且忍耐,至到結果。」

斗底下嘅燈

16 「冇人點燈,用斗嚟遮住佢,或拎嚟放喺床底下。佢必將燈放喺燈臺上,等入嚟嘅人睇得見亮光。

17 任何隱藏嘅事總會被張揚出嚟,任何掩蓋嘅事亦會被揭露出嚟,為人所知。

18 所以,你哋要留心聽;因為凡有嘅,要俾佢更多;冇嘅,連佢自以為有嘅都要奪去。」

耶穌嘅母親同兄弟

19 耶穌嘅母親同細佬嚟見佢,因為人多,不能接近佢。

20 有人話俾耶穌知:「你嘅母親同細佬企喺外邊想見你!」

21 耶穌對佢哋話:「凡聽上帝嘅道理而實行嘅,就係我嘅母親同兄弟!」

耶穌平息風浪

22 有一日,耶穌同門徒上船,對佢哋話:「我哋到湖嘅嗰邊!」佢哋就出發。

23 船行時,耶穌瞓着。忽然有一陣狂風襲擊湖面,船灌滿水,非常危險。

24 門徒嚟叫醒耶穌,話:「老師,老師,我哋快冇命啦!」耶穌醒過嚟,斥責狂風大浪,風浪就止息,湖面平靜。

25 耶穌問佢哋:「你哋信心喺邊處呢?」佢哋又希奇又驚慌,彼此講話:「呢個人到底係邊個呢?佢向風浪命令,風浪都聽從佢!」

耶穌醫好被鬼迷嘅人

26 佢哋渡過加利利湖到對岸格拉森地區。

27 耶穌上岸,當地有個被鬼迷嘅人迎面走過嚟。佢已經好耐冇着衣服,唔住喺屋企,住喺墳地。

28 佢一睇見耶穌,就叫起嚟,俯伏喺耶穌面前,大聲話:「至高上帝嘅仔耶穌,你點解要干擾我呢?我求你唔好折磨我!」

29 佢噉樣講係因為耶穌曾命令污靈從嗰個人身上出嚟。好多次污靈捉住佢,甚至當佢被拘禁、手腳被鎖鍊鎖住,佢竟然將鎖鍊整斷,被鬼趕去荒野。

30 耶穌問佢話:「你叫乜嘢名?」佢答話:「我叫『大羣』」,因為有好多鬼迷住佢。

31 鬼央求耶穌,唔好將佢哋趕落深淵。

32 喺附近山坡上有一大羣豬食緊嘢。鬼就央求耶穌,准佢哋去羣豬處;耶穌就准佢哋。

33 鬼就從嗰個人身上出嚟,入去豬羣;噉就成羣衝落山崖,入湖浸死。

34 看豬嘅睇見呢件事,就走去鎮內同鄉下傳佈消息。

35 當地嘅居民出嚟,睇發生乜嘢事。佢哋到耶穌處,發現鬼所離開嘅人坐喺耶穌腳前,穿着衣服,神智清醒,就驚慌起嚟。

36 睇見呢啲事嘅人將嗰個人得醫治嘅經過話俾眾人知。

37 於是格拉森地區嘅居民要求耶穌離開嗰處,因為佢哋非常驚慌。耶穌就上船離開。

38 鬼所離開嘅人要求耶穌話:「請准我跟從你去!」但耶穌打發佢返去,話:

39 「你回家,傳揚上帝為你所做嘅事。」佢就去,走遍全鎮,傳揚耶穌為佢所做嘅事。

睚魯嘅女同患血漏嘅女人

40 耶穌返到湖嘅對岸,羣眾歡迎佢,因為眾人都喺處等候佢嚟。

41 有個會堂主管,名睚魯,亦嚟。佢俯伏喺耶穌腳前,求耶穌去佢家中,

42 因為佢十二歲嘅獨生女快要死。耶穌去時,人羣前後逼住佢。

43 有一個女人患血漏已經十二年;佢喺醫生手上花盡所有嘅錢,仍冇人能夠醫好佢。

44 佢走到耶穌背後,摸吓耶穌外袍嘅衫角,佢嘅血漏立刻止住。

45 耶穌問:「邊個摸我?」眾人都唔承認。彼得話:「老師,你前後左右都係人,眾人逼住你啫!」

46 但係耶穌話:「有人摸我,因為我知道有能力從我身上出去!」

47 嗰個女人知道自己已經被發覺,就戰戰兢兢嚟跪喺耶穌面前,當住眾人,話俾耶穌知佢點解嚟摸佢,又點樣立刻得醫治。

48 耶穌對佢話:「女呀,你嘅信心救咗你!平安返去喇。」

49 耶穌正講呢啲話時,有人從會堂主管嘅家趕嚟,話睚魯知:「你嘅女已經死,唔使再麻煩老師咯。」

50 耶穌聽見就對睚魯話:「唔使怕,只要信;佢會好返嘅。」

51 耶穌到睚魯家中時,除咗彼得、約翰、雅各,同女仔嘅父母,唔准人同佢一齊入去。

52 喺嗰處嘅人都為呢個女大哭泣叫。耶穌話:「唔好喊!佢冇死,不過瞓着啫。」

53 眾人都譏笑佢,因為佢哋知道個女仔已經死。

54 耶穌拉住佢嘅手,呼叫話:「女仔,起身喇!」

55 佢就活過嚟,立刻起身。耶穌吩咐佢哋俾嘢佢食。

56 女嘅父母好驚奇,耶穌鄭重吩咐佢哋,唔好將所發生嘅事話任何人知。