路加福音 9
耶穌打發十二門徒1 耶穌召集十二門徒,賜佢哋趕鬼同醫治疾病嘅權力,
2 然後打發佢哋出去傳上帝國嘅福音,並且醫治病人。
3 佢對門徒話:「你哋喺路上時,乜嘢都唔使帶:唔使帶手杖,旅行袋,食物或錢,亦唔需要有兩件內衣。
4 無論到乜嘢地方,邊一家願意接待你哋,就住喺嗰家,直到你哋離開嗰處。
5 遇到唔接待你哋嘅人,你哋喺離開嗰個市鎮時,將腳上嘅塵土亦拍去,表示對佢哋嘅警告。」
6 門徒就出門,走遍各村鎮,傳福音,到處醫病。
希律嘅困惑7 加利利嘅希律王聽聞所發生嘅一切事,心裏非常困惑,因為有人話:「施洗約翰復生!」
8 亦有人話係以利亞顯現;又有人話古時嘅一個先知復生。
9 希律話:「我已經斬去約翰嘅頭,但係此人又係邊個呢?我竟聽到好多關於佢嘅事。」因此佢一直想見耶穌。
俾五千人食飽10 使徒一返嚟,將佢哋所做嘅一切都向耶穌報告。耶穌帶佢哋,靜靜去一個叫伯賽大嘅城。
11 羣眾一知道,就跟住佢去。耶穌歡迎佢哋,向佢哋講解有關上帝國嘅事,又醫好需要醫治嘅人。
12 日頭將落時,十二門徒嚟見耶穌,對佢話:「請叫羣眾散開,等佢哋到附近嘅村莊搵嘢食同住嘅地方,因為呢處地方好偏僻。」
13 但係耶穌對佢哋話:「你哋俾佢哋食喇!」佢哋話:「我哋只有五個餅同兩條魚。唔通你要我哋去買食物俾呢一大羣人食咩?」
14 〈男人嘅數目約有五千。〉耶穌對佢哋話:「叫羣眾一組一組坐落,每組約五十人。」
15 門徒照佢嘅話做,等羣眾都坐落。
16 耶穌拎起五個餅同兩條魚,舉目望天,感謝上帝,然後擘開,遞俾門徒,門徒就分俾羣眾。
17 眾人都食,而且食飽。門徒將食剩嘅零碎收拾起嚟,裝滿十二籃。
彼得認耶穌為基督18 有一次,耶穌單獨一人禱告,門徒亦同埋喺處。佢問佢哋話:「眾人話我係邊個?」
19 佢哋答話:「有啲話你係施洗約翰;有啲話你係以利亞;亦有啲話你係古時嘅一位先知復生。」
20 耶穌問佢哋:「你哋呢?你哋話我係邊個?」彼得答話:「上帝所立嘅基督!」
預言佢嘅受難同死21 於是,耶穌嚴肅命令佢哋唔好將呢件事話俾任何人知。
22 跟住佢又話:「人子必須遭受好多苦難,被長老、祭司長,同經學教師棄絕,並且被殺,第三日復生。」
23 耶穌又對眾人話:「若有人想跟從我,就要捨棄自己,日日背起佢嘅十字架嚟跟從我。
24 因為凡想救自己生命嘅,反會喪失生命;凡為我喪失生命嘅,反會得到生命。
25 人就係贏到全世界,但失去自己或賠上自己嘅生命,有乜嘢益呢?當然冇!
26 凡以我同我嘅話為恥嘅,人子喺佢榮耀中,並父與聖天使榮耀中降臨時,亦以佢為恥。
27 我實在話你哋知,企喺呢處嘅人,有啲喺死以前必睇見上帝嘅國!」
改變形像28 講完呢啲話以後約八日,耶穌帶埋彼得、約翰,同雅各上山禱告。
29 耶穌喺禱告時面貌改變;佢嘅衣服亦變成潔白發光。
30 忽然有兩個人出現同佢講話,呢兩個人係摩西同以利亞。
31 佢哋喺榮耀中顯現,同耶穌談論佢將喺耶路撒冷以死嚟完成使命嘅事。
32 彼得同佢嘅同伴都瞓得好腍;佢哋一醒,睇見耶穌嘅榮耀及同佢企喺一齊嘅兩個人。
33 嗰兩個人要離開耶穌時,彼得對耶穌話:「老師,我哋喺呢處真好!等我哋搭三座帳幕,一座俾你,一座俾摩西,一座俾以利亞。」〈佢實在唔知所講嘅係乜嘢。〉
34 佢講緊呢啲話時,有雲出現,遮住佢哋,雲彩移近時,門徒都好驚慌。
35 忽然有聲從雲裏傳出,話:「呢個係我嘅仔,我所揀選嘅。你哋要聽從佢!」
36 聲音停止後,只有耶穌一人喺處。喺嗰啲日子,門徒對呢件事守口如瓶,冇各任何人提起佢哋所睇見嘅事。
醫好被鬼迷嘅兒童37 第二日,佢哋落山時,有一大羣人嚟迎接耶穌。
38 人羣中忽然有人呼叫話:「老師,求你救我嘅仔,佢係我獨生嘅!
39 鬼成日襲擊佢,使佢突然大喊大叫,又使佢縮攣,口吐白泡;鬼不停傷害佢,唔肯罷休!
40 我求你嘅門徒將鬼趕走,但係佢哋做唔到。」
41 耶穌話:「唉!冇信及悖逆嘅世代呀!我喺你哋處重要容忍你哋幾耐呢?帶你嘅仔來我處喇!」
42 個仔嚟時,鬼將佢推倒喺地,使佢不停縮攣。耶穌斥責個邪鬼,將個仔醫好,交返佢父親。
43 眾人對上帝嘅大能都好驚奇。
耶穌再預言自己嘅死44 眾人對耶穌所做一切嘅事仍然驚奇時,耶穌又對佢嘅門徒話:「唔好忘記我要向你哋講嘅話:人子要被交喺人手裏。」
45 但係佢哋唔明白此話嘅意思;因為意思係隱密嘅,使佢哋不能明白。佢哋又唔敢問佢呢件事嘅究竟。
邊個最大46 門徒爭論究竟佢哋之中邊個最大。
47 耶穌知佢哋心中嘅議論,就叫一個孩子嚟,叫佢企喺自己旁邊,
48 然後對佢哋話:「凡為我嘅名接待呢個小孩嘅,就係接待我;凡接待我嘅,就係接待差遣我嚟嘅。你哋中邊個係最小嘅,就係最大嘅。」
反對或贊同49 約翰對耶穌話:「老師,我哋睇見有人奉你嘅名趕鬼,我哋禁止佢,因為佢唔係跟從我哋嘅。」
50 耶穌就對佢哋話:「唔好禁止佢,因為唔反對你哋嘅,就係贊同你哋。」
唔接待耶穌嘅村莊51 耶穌被接升天嘅日子快到,佢定意去耶路撒冷,
52 於是派人先行。佢哋嚟到撒馬利亞嘅一村莊,想替耶穌準備一切。
53 但係嗰個地方嘅人唔歡迎佢,因為佢面向耶路撒冷嚟行。
54 佢嘅門徒雅各同約翰見呢個情形,就話:「主呀,你要我哋吩咐天上嘅火嚟燒滅佢哋嗎?」
55 耶穌回頭,責備佢哋,話:「你哋唔知道人子嚟嘅目的,唔係要毀滅人嘅生命,係要拯救佢哋。」。
56 佢哋就去第二條村。
要跟從耶穌嘅人57 喺佢哋旅途中,有一人對耶穌話:「你無論去邊處,我都跟從你。」
58 耶穌話:「狐狸有洞,飛鳥有巢,但人子連枕頭嘅地方都冇。」
59 佢又對另一個人話:「嚟跟從我。」嗰個人話:「主呀,請准我先去埋葬父親。」
60 耶穌話:「任由死人去埋葬佢哋嘅死人!至於你,你要去傳上帝國嘅福音。」
61 又有一個人話:「主呀,我要跟從你,但係請准我先去向家人告別。」
62 耶穌對佢話:「手執犁耙而不斷回頭睇後面嘅,嗰個人對上帝國係唔適宜嘅!」