羅馬書 5
因信稱義1 既然我哋因信能得稱義,我哋就藉賴主耶穌基督同上帝有和睦嘅關係。
2 因信,基督使我哋能活喺上帝嘅恩典裏,我哋就歡歡喜喜盼望分享上帝嘅榮耀!
3 即使喺患難中,我哋仍然歡喜;因為我哋知道患難培養忍耐,
4 忍耐產生毅力,毅力帶嚟盼望。
5 盼望唔會使我哋失望;因為上帝透過佢賜俾我哋嘅聖靈,將佢嘅愛澆灌喺我哋心裏。
6 當我哋重係軟弱時,基督就照上帝特定嘅日子為罪人死。
7 為義人死係難以想像嘅;為善人死,或者有人敢做。
8 但上帝對我哋顯示無比嘅愛;當我哋重係罪人時,基督為我哋死!
9 現今我哋既因佢嘅血得稱義;豈唔更要藉着佢救我哋脫離上帝嘅義憤咩。
10 我哋原本係上帝嘅仇敵;但藉上帝子之死,得與上帝和好,既然和好,豈唔更因佢嘅生就得救咩?
11 唔單只噉,我哋既藉主耶穌基督,得與上帝和好,亦必藉佢以上帝為樂。
亞當同基督12 罪由—人入世界,死係由罪而嚟;於是死臨到全人類,因為人人都犯罪。
13 喺律法頒佈以前,世界就有罪;但係未有律法,人就唔喺律法嘅標準下被懲罰。
14 從亞當到摩西,死支配人類,甚至唔同亞當犯一樣罪過嘅,唔服從上帝嘅人,亦不免一死。亞當係預表以後要嚟嘅嗰一位。
15 但係,兩者並唔相同,因為上帝白白嘅恩賜同亞當嘅罪大有差別。冇錯有好多人因亞當一人嘅罪而死。但係上帝嘅恩賜更浩大;佢因耶穌基督一人白白賜俾好多人嘅恩賜亦一樣浩大。
16 上帝嘅恩賜同一個人嘅過犯係完全兩樣嘅。一個人犯罪,被判「有罪」;但係好多人犯罪,得到嗰個唔配得嘅恩賜,而被判「無罪」!
17 冇錯,死亡因一個人犯罪開始支配世人,但係耶穌基督一人所成就嘅更為浩大!所有領受上帝豐富嘅恩賜同白白稱義嘅人,都要因基督而生,而掌權。
18 噉樣,因一人犯罪,眾人都被定罪;同樣,因一人嘅義行,眾人都得到赦罪而獲得生命。
19 就好似一個人違背命令,眾人成為罪人;同樣,一個人順服,眾人成為義人。
20 律法嘅制訂使過犯增多;但係罪越增多,上帝嘅恩典亦更加豐富。
21 好似罪透過死亡嚟管轄,上帝嘅恩典亦透過公義嚟統治,使我哋透過我哋嘅主耶穌基督得到永生。