羅馬書 6
向罪而死,在基督裏而生1 噉樣,我哋要點樣講呢?我哋應該繼續生活喺罪裏,令上帝嘅恩典顯得更豐富咩?
2 當然唔可以!由罪呢一方面嚟講,我哋已經係死咗。我哋點可能繼續生活喺罪裏呢?
3 豈唔知我哋受洗同基督耶穌合而為一,亦即係受洗歸入佢嘅死。
4 由洗禮,我哋已經與佢同歸於死,一齊埋葬;係要我哋過新嘅生活,好似天父用佢榮耀嘅大能使基督從死者中復生一樣。
5 若我哋同基督合而為一,經歷咗佢嘅死,我哋亦要同樣經歷佢嘅復生。
6 我哋知道,我哋嘅舊我已經同基督同釘十字架,摧毀我哋嘅罪性,使我哋唔再做罪嘅奴隸。
7 因為人死咗就脫離罪嘅權勢。
8 若我哋共基督同死,我哋信,亦必共基督同生。
9 因為我哋知道基督已從死者中復生,就唔再死;死亦再不能控制佢。
10 佢嘅死,係同罪決絕,一次過就完全成功;佢現今生,係為上帝而生。
11 同樣,由罪嗰方面嚟講,你哋要將自己當做死,但係喺基督耶穌嘅生命裏,你哋係為上帝而生。
12 所以,唔好再俾罪支配你哋必朽壞嘅身體,使你哋順服本性嘅情慾。
13 亦唔好使你哋身體嘅任何部份向罪投降,做邪惡嘅工具。你哋要將自己奉獻俾上帝,好似從死者中復生嘅人,將整個自己奉獻俾佢,做公義嘅器皿。
14 從此,你哋唔好再受罪嘅管轄;因為你哋已經唔喺律法之下,係喺上帝恩典之下。
義嘅奴僕15 噉就點講呢?因為我哋唔喺律法之下而喺上帝恩典之下,我哋就可以犯罪咩?絕對唔可以!
16 豈唔知當你哋做人嘅奴僕去服從主人時,你哋就係佢嘅奴僕。即係話,你哋做罪嘅奴僕,結果就係死;你哋順服上帝,就能成為義人。
17 多謝上帝! 雖然你哋曾經係罪嘅奴僕,但現今你哋就一心順從所傳俾你哋嘅教訓。
18 你哋已經由罪中被釋放,而成為義嘅奴僕。
19 我怕你哋難了解我嘅意思,所以用好普通嘅例對你哋講。以前你哋放縱情慾,為非作歹,做罪嘅奴僕。現今你哋要完全奉獻自己,做義嘅奴僕,成為聖潔嘅器皿。
20 當你哋做罪嘅奴僕時,你哋唔受義嘅管束。
21 你哋現今認為可恥嘅事,當時做咗,到底得到乜嘢好處呢? 不過係死!
22 現今,你哋已經從罪裏被釋放,做上帝嘅奴僕;你哋將生命完全奉獻俾佢,所收穫嘅就係永生。
23 因為罪嘅代價係死亡;但係上帝賜俾我哋嘅恩典係同主基督耶穌合而為一,而得到永生。