羅馬書 7
以婚姻關係為例1 兄弟呀!你哋都係識律法嘅人,所以你哋必會明白我所要講嘅:律法對人嘅約束係人在生時致有效力。
2 舉個例講,一個已婚嘅女人,只要丈夫在生,喺律法嘅約束下,就不能離開丈夫;丈夫死咗,佢就唔再受呢種律法嘅限制。
3 所以,丈夫在生時,佢若同第二個男人同居,就被當做淫婦;若丈夫死咗,佢喺律法上係一個自由嘅人,若同第二個男人結婚,並唔算犯姦淫。
4 兄弟呀,你哋嘅情形亦係噉樣。喺律法上講,你哋已經死,因為你哋係基督身體嘅一部份;現今你哋係屬於嗰位從死者中復生嘅主,使我哋能好好去為上帝工作。
5 當我哋重係照人嘅本性生活時,摩西嘅律法激起我哋嘅邪念,喺我哋嘅肉體中發作,結果係死亡。
6 但現今律法已經不能拘束我哋;因為從管束我哋嘅律法嚟講,我哋已經死。我哋唔再依照律法條文嘅舊方式,而係依照聖靈嘅新指示嚟事奉上帝。
律法同罪7 噉樣,我哋可以話律法本身係罪咩?當然唔可以!但係,透過律法,我致知道罪係乜嘢。若唔係律法話「唔好貪心」,我就唔知道貪心係乜嘢。
8 罪透過律法嘅命令,搵機會,喺我心裏激發種種貪念。若冇律法,罪就無機可乘。
9 我以前生活喺律法之外;後來有咗律法嘅命令,罪就活躍起嚟,結果我喺罪中死咯。
10 原來律法嘅命令係要使人得生命;但係,對我嚟講,佢反而帶嚟死亡。
11 因為罪透過律法嘅命令搵機會引誘我,亦透過律法嘅命令置我於死地。
12 摩西嘅律法本身係神聖嘅;律法嘅命令係神聖、公平,同良善嘅。
13 噉樣嗰啲良善嘅使我死亡咩?當然唔係!係罪!只係罪透過嗰啲良善嘅,帶嚟死亡,為要使罪嘅真面目更加明顯。透過律法嘅命令,罪嘅惡性就變本加厲咯。
人嘅自我分裂14 我哋知道,摩西嘅律法係屬靈嘅;但係我係必朽壞嘅人,已經賣俾罪做奴隸。
15 我竟然唔明白我所做嘅;因為我所願意嘅,我偏唔做;我所恨惡嘅,我反而去做。
16 我若做咗我唔願意做嘅事,我就唔可以唔承認律法係善嘅。
17 既然噉樣,我所做嘅就唔係真係我做嘅,而係喺我裏面嘅罪做嘅。
18 我亦知道,喺我裏面,就係喺我嘅本性裏面,冇良善。因為,我有行善嘅願望,但係冇行善嘅能力。
19 我所願意嘅善,我偏唔做;我所唔願意嘅惡,我反而去做。
20 若我做我唔願意做嘅,就表示呢啲唔係我做嘅,而係喺我裏面嘅罪做嘅。
21 我發覺有一個法則喺處作怪:當我願意行善時,邪惡總係糾纏住我。
22 我嘅內心原本喜愛上帝嘅法則,
23 但我嘅身體又受另一個法則嘅驅使—此法則同我內心喜愛嘅法則交戰,使我不能脫離束縛我嘅罪嘅法則;此法則喺我裏面作怪。
24 我真苦呀!邊個能救我脫離呢個使我死亡嘅身體呢?
25 多謝上帝,透過我哋嘅主耶穌基督,我就得救脫。我自己只能喺心靈上順服上帝嘅法則,而自私嘅慾望就使我服從罪嘅法則。