Library · yue

羅馬書 8

傾向過聖靈嘅生活

1 現今,生喺基督耶穌生命裏嘅人就唔被定罪。

2 因為聖靈嘅法則,使我哋同基督耶穌聯合而得生命,已經從罪同死嘅法則下將我哋釋放。

3 摩西嘅律法因人性嘅軟弱而唔能成就嘅,上帝就親自成就。上帝打發自己嘅仔,成為罪身嘅形狀,在肉體中定咗罪案,將罪除去。

4 上帝噉樣做係要使律法嘅義實現喺我哋唔服從本性、只順服聖靈嘅人身上。

5 因為,服從本性嘅人傾向本性嘅事;順服聖靈嘅人傾向聖靈嘅事。

6 傾向本性,結果係死;意向聖靈,將得到生命同平安。

7 所以,傾向本性嘅人係同上帝為敵;因為佢唔順服上帝嘅法則,事實上亦不能。

8 服從本性嘅人不能得到上帝嘅喜歡。

9 至於你哋,若上帝嘅靈真係住喺你哋裏面,你哋嘅生活就唔受本性支配,只受聖靈管束。人若冇基督嘅靈就唔屬於基督。

10 基督若住喺你哋裏面,雖然你哋嘅身體將因罪而死,但上帝嘅靈將使你哋因義得生。

11 若使耶穌從死者中復生;上帝嘅靈住喺你哋裏面,呢位使基督從死者中復生嘅上帝,亦要透過住喺你哋心裏嘅聖靈,將生命賜俾你哋必朽壞嘅身體。

12 為噉,兄弟呀,我哋嘅生活唔應該再受本性嘅支配。

13 你哋若服從本性,必死亡;你哋若依靠聖靈治死罪行,必得生。

14 凡被上帝嘅靈引導嘅人都係上帝嘅仔女。

15 因為,上帝所賜嘅靈唔係要奴役你哋,使你哋恐懼,而係要使你哋成為上帝嘅仔女。透過聖靈,我哋向上帝呼叫:「阿爸! 父呀!」

16 上帝嘅靈同我哋嘅靈一齊證實我哋係上帝嘅仔女。

17 既然係上帝嘅仔女,我哋就享有上帝為佢嘅子民所預備嘅福,亦要與基督同享上帝為佢保留嘅;因為,只要我哋分擔基督嘅苦難,我哋亦必分享佢嘅榮耀。

將來嘅榮耀

18 我認為,我哋現今嘅苦難同將來要顯明俾我哋嘅榮耀相比係唔算得乜嘢。

19 一切被造嘅都切望上帝嘅榮耀由佢咁多嘅仔女顯示出嚟。

20 因為整個被造嘅變成虛空,唔係自己想嘅,係出於上帝嘅旨意。但被造嘅仍然喺處盼望,

21 有一日能擺脫嗰個會朽壞嘅約束,能同上帝嘅仔女分享光榮嘅自由。

22 我哋知道,直到現今,一切被造嘅都在痛苦呻吟,好似經歷生產嘅陣痛。

23 唔只被造嘅係噉樣,我哋得到上帝所賜初熟嘅果,即係得到聖靈嘅人,亦喺心裏歎息,等候上帝收養我哋做佢嘅仔女,使我哋整個身體得自由。

24 因為我哋得救係根據盼望;若我哋睇得見所盼望嘅,就唔係真嘅盼望。邊個重盼望佢睇得見嘅呢?

25 若我哋盼望嗰啲睇唔見嘅,我哋就會忍耐等候。

26 同樣,我哋嘅軟弱有聖靈幫助。我哋本來唔知道應該點樣禱告;但係聖靈親自用言語所不能表達嘅歎息為我哋向上帝祈求。

27 洞察人心嘅上帝知道聖靈嘅意思,因為聖靈依照上帝嘅旨意,代聖徒祈求。

28 我哋知道,上帝同嗰啲愛佢嘅人,即係佢按照自己嘅旨意所呼召嘅,共同工作,使萬事都有益於佢哋。

29 因為上帝預知佢哋,將佢哋預先揀選出嚟,使佢哋同佢嘅仔有相同嘅特質,使佢嘅仔喺好多兄弟中居首位。

30 上帝預先揀選嘅人,佢呼召佢哋;佢呼召嘅人,佢稱佢哋為義人;所稱為義人嘅人,又令佢哋分享榮耀。

上帝嘅愛從耶穌表現出來

31 既然噉樣,我哋應該點講呢?上帝若輔助我哋,邊個能敵對我哋呢?

32 佢連自己嘅仔都唔顧惜,將佢俾我哋。豈唔更將萬物白白賜俾我哋咩?

33 邊個會控告上帝揀選嘅人呢?上帝已經宣佈佢哋無罪!

34 邊個重會定佢哋嘅罪呢?斷唔會係基督耶穌!佢死咗,但已經復生、現今正喺上帝嘅右邊代我哋向上帝祈求!

35 噉樣,邊個能使我哋同基督嘅愛隔絕呢?係患難咩?困苦咩?迫害咩?飢餓咩?貧窮咩?危險咩?死亡咩?

36 好似聖經話:「為你嘅緣故,我哋成日被置於死地;人將我哋當做等待宰殺嘅羊。」

37 但在呢一切事情上,我哋靠愛我哋嘅主已經獲得完全嘅勝利!

38 因為我確信,乜嘢都不能使我哋同上帝嘅愛隔絕。或死,或生;或天使,或其他喺天上掌權嘅;或現今,或將來;

39 或高天,或深淵;喺整個被造嘅宇宙中,冇任何事物令我哋同上帝嘅愛隔絕,此愛係在我哋嘅主耶穌基督裏面。