Library · yue

羅馬書 9

上帝同佢嘅選民

1 我講真實嘅話;我屬於基督,我冇講大話。我嘅良心喺聖靈嘅光照下亦證實我冇講大話:

2 我有大憂愁,心裏有無限傷痛!

3 為我嘅同胞,我骨肉之親,雖然我自己被上帝咒詛,同基督隔絕,我亦願意。

4 佢哋係上帝嘅選民;上帝使佢哋有仔女嘅名份,分享佢嘅榮耀。上帝同佢哋立約,賜律法俾佢哋;佢哋知道點樣敬拜上帝,亦接受咗佢嘅應許。

5 佢哋係眾族長嘅子孫,按照身世嚟講,基督同佢哋係同一族嘅。願嗰位統治萬有嘅上帝永遠得到頌讚,阿們!

6 我並唔係話上帝嘅應許已經落空。因為,以色列人唔盡係上帝嘅選民;

7 亞伯拉罕嘅子孫亦唔盡係上帝嘅仔女。上帝曾對亞伯拉罕話:「惟有由以撒生嘅致算係你嘅子孫」。

8 即係話,由自然嘅生育過程所生嘅,唔係每個都係上帝嘅仔女;惟有由上帝嘅應許所生嘅致算係上帝嘅仔女。

9 因為上帝嘅應許係噉樣話:「喺時機成熟時,我要返嚟,撒拉必生一個仔」。

10 不獨係噉,利百加嘅兩個仔都係由一個父,我哋嘅先祖以撒生嘅。

11 但為表示佢的確係根據自己嘅旨意揀選其中一個,上帝對利百加話:「大仔要服事細仔」。(佢講呢啲話時,佢哋重未出世,重未行善或作惡;可見上帝嘅揀選係出於自己嘅旨意,同佢哋嘅行為冇關係。)

12 拼於上節

13 好似聖經所講:「我愛雅各,勝過愛以掃」。

14 噉樣,我哋可以話上帝唔公平咩?當然唔可以。

15 因為佢對摩西講過:「我要憐憫邊個就憐憫邊個;要體恤邊個就體恤邊個!」

16 可見上帝嘅揀選唔係根據人嘅意志或努力,係出於佢嘅憐憫。

17 聖經裏論及法老話:「我立你做王,為要用你嚟彰顯我嘅權能,使我嘅名傳遍天下」。

18 噉樣,上帝要憐憫邊個就憐憫邊個;要使邊個頑固就使邊個頑固。

上帝嘅義憤同憐憫

19 或者你會對我話:「既然噉樣,上帝點能責怪人?邊個能抗拒佢嘅旨意呢?」

20 但朋友呀,你係邊個,竟敢同上帝辯駁呢?瓦器點能對造佢嘅人話:「點解將我造成噉樣呢?」

21 陶匠豈冇權拎泥土嚟造佢所要造嘅;佢可以用同一團泥土製造兩個器皿,一個貴重嘅,一個普通嘅。

22 上帝所做嘅亦係噉樣。佢要顯示佢嘅義憤,彰顯佢嘅權能。為噉佢以耐心寬容佢發嬲嘅對象,即係嗰啲本來應該被擊碎嘅器皿。

23 佢亦要將佢豐富嘅榮耀向我哋顯明出嚟。我哋係佢憐憫嘅對象,而且係佢所預備嚟接受佢嘅榮耀嘅人。

24 因為我哋唔單係佢從猶太人中,亦係從異邦人中,呼召出嚟嘅。

25 好似佢喺何西阿書所講:「本來唔係我嘅子民,我要稱佢哋為『我嘅子民』,本來我唔愛嘅國,我要稱佢為『我所愛嘅』。

26 以前我曾經對佢哋話:『你哋唔係我嘅子民』但現今佢哋要被稱為:『永生上帝嘅仔女!』

27 關於以色列人,以賽亞曾經話:「雖然以色列人好似海沙咁多,但只有少數人得救,

28 因為主將迅速而徹底審判全人類。」

29 又好似以賽亞以前講過:「假如主萬軍嘅統帥唔為我哋留下一啲後代,我哋早已好似所多瑪、蛾摩拉一樣咯」。

以色列人同福音

30 噉樣,我哋應該點講呢?嗰啲本來唔尋求上帝嘅義嘅異邦人,反因信而成為義人;

31 嗰啲尋求由律法成為義人嘅選民,反而不能達到目的。

32 點解呢?因為佢哋唔倚靠信心,而倚靠行為,結果跌喺「絆腳石」上。

33 好似聖經所講:「我喺錫安放下—絆腳嘅石,令人絆倒嘅石!但信靠佢嘅人不至於失望。」