啟示錄 13
兩隻獸1 跟住,我睇見一隻獸由海上嚟。有十角七頭,十角戴住王冠,七頭上有侮辱上帝嘅名號。
2 我睇見嘅獸似一隻豹;腳似熊嘅腳,口似獅嘅口。龍將自己嘅能力、王座,同大權交俾嗰隻獸。
3 獸嘅一個頭似乎受過致命重傷,但佢嘅傷已經醫好。全地嘅人都好驚奇,來跟從嗰隻獸。
4 眾人又拜龍,因為龍將佢嘅權交俾獸。佢哋亦拜嗰隻獸,話:「邊個能同呢隻獸相比?邊個敵得過佢呢?」
5 嗰隻獸得到個誇大褻瀆嘅口,又被授權可以任意而行四十二個月。
6 獸就開口侮辱上帝,褻瀆佢嘅名、佢嘅居所,同所有住喺天上嘅。
7 佢得到批准去攻擊聖徒,打敗佢哋;亦被授權可轄制各部落、各民族、各語言、各國。
8 所有地上嘅人,名字喺創世之前冇登記喺被殺羔羊嘅生命冊上嘅,都要拜佢。
9 「有耳就應當聽!
10 所有應該被俘擄嘅,必被俘擄;用刀殺人嘅,必喺刀下喪生。為噉聖徒都需要有忍耐同信心。」
11 我又睇見另一隻獸從地裏出嚟。有兩角,好似羊嘅角,但係講嘢好以龍。
12 佢喺頭一隻獸前,行使頭一隻獸嘅一切大權。佢強迫大地同所有住喺地上嘅,去拜嗰隻曾受過致命重傷又醫好嘅頭一隻獸。
13 第二隻獸又行奇蹟;佢喺人前使火從天降落地上。
14 佢得到權力,喺頭一隻獸前行奇蹟,因而迷惑所有住喺地上嘅人。佢吩咐世上嘅人為嗰隻受刀傷而仍然生存嘅獸造像。
15 第二隻獸又得權力,可以將氣吹入頭一隻獸嘅像裏,使像能講話,並殺死所有唔拜獸像嘅人。
16 此獸又強迫所有嘅人,無論大小、貧窮富貴、奴隸或自由人,喺佢哋右手同額上蓋印。
17 印就係嗰隻獸嘅名或代表獸名嘅數目;冇此印記嘅就不能做買賣。
18 呢處需要有智慧。所有聰明人都能計算獸嘅數目,因為呢啲係人嘅數目,佢嘅數目係六百六十六。