啟示錄 14
救贖之歌1 我又睇見羔羊企喺錫安山上,同佢一齊嘅有十四萬四千人;佢哋額上都寫住佢同佢父嘅名。
2 我聽見從天上有聲音,好似大瀑布嘅聲,亦好似雷轟。我聽見嘅亦好似琴師所彈嘅琴聲。
3 佢哋企喺寶座同四生物及眾長老前唱歌,好似係新歌;此新歌只有由地上被救贖嘅十四萬四千人會唱。
4 呢啲人都冇親近過女人,佢哋原係童身。羔羊去到邊處,佢哋就跟到嗰處。佢哋係從人類中被贖出嚟,首先用嚟獻俾上帝同羔羊嘅。
5 佢哋從來唔講大話,亦係冇瑕疵嘅。
三位天使6 我又睇見有另一位天使喺空中;有永遠嘅福音傳俾住喺地上嘅人,即係各國,各部落、各民族,各種語言嘅人。
7 佢大聲話:「要敬畏上帝,將榮耀歸俾佢!因為佢審判人類嘅時候已經到。要敬拜嗰位創造天、地、海,同一切泉源嘅主!」
8 第二位天使跟住話:「冧喇!大巴比倫冧喇!因為佢將淫蕩嘅烈酒俾萬民飲。」
9 第三位天使跟住前兩位天使大聲話:「邊個敬拜獸同獸像,喺額或手受過印記嘅,
10 就要飲上帝嘅烈酒;此酒係純而不稀嘅、倒喺佢忿怒嘅杯裏!佢哋要喺聖天使同羔羊面前受烈火同硫磺嘅酷刑。
11 折磨佢哋嘅煙向上升直到永遠。拜獸同獸像及額有佢名印記嘅人,成日唔得安寧。」
12 為噉,服從上帝命令,忠於耶穌嘅聖徒需要有忍耐。
13 我又聽見從天上有聲話:「從今以後,為主而死嘅人有福!你要將此話寫落。」聖靈答話:「冇錯!佢哋將結束勞苦,享受安息,因為工作嘅成果必跟隨佢哋。」
地上嘅農作物14 我又睇見一嚿白雲,坐喺雲上有一位似人子嘅,頭上載住金冠冕,手拎住鋒利嘅鐮刀。
15 另外有一位天使從聖殿出嚟,對坐喺雲上嘅大聲叫話:「因為收割嘅時已到,地上嘅農作物已經熟透!伸出你嘅鐮刀嚟收割喇!」
16 於是坐喺雲上嘅向地面揮動鐮刀,地上嘅農作物就被收割。
17 另一位天使從天上嘅聖殿出嚟;佢亦揸住一巴鋒利嘅鐮刀。
18 跟住,又有一位管理火嘅天使由祭壇出嚟,對揸住鋒利鐮刀嘅天使大聲叫:「伸出你嘅鐮刀嚟收取地上嘅葡萄,因為葡萄已經成熟!」
19 於是天使向地面揮動鐮刀,收取地上嘅葡萄,將佢扔喺上帝忿怒嘅大榨酒池裏。
20 葡萄喺城外嘅榨酒池裏被踹,就有血由榨酒池流出,淹沒咗三百公里,深差唔多兩公尺。