啟示錄 19
1 此後,我聽見好似羣眾喺天上大聲話:「哈利路亞(即係:讚美耶和華之意),救恩、榮耀、權能都係從我哋嘅上帝嚟嘅!
2 佢嘅審判係真實公義嘅!因為佢審判嗰個用淫行敗壞世界嘅大淫婦,懲罰佢殺死上帝僕人嘅罪。」
3 佢哋又話:「哈利路亞!焚燒嗰個大城嘅煙不停上升,直到永遠!」
4 於是,二十四位長老同四生物俯伏敬拜坐喺寶座嘅上帝,話:「阿門!哈利路亞!」
羔羊嘅婚宴5 有聲從寶座發出,話:「所有上帝嘅僕人,所有敬畏佢嘅,無論尊貴卑微,都要讚美我哋嘅上帝!」
6 我又聽見好似係羣眾嘅聲,好似大瀑布同雷轟嘅響聲,話:「哈利路亞!因為我哋嘅主一全能嘅上帝做王!」
7 我哋要歡喜快樂,將榮耀歸俾上帝!因為羔羊嘅婚期到咗;新娘亦準備好。
8 上帝已經賜俾佢潔白光明嘅麻衣。(麻依係指聖徒嘅義行。)
9 於是,天使對我話:「你要寫落:被邀請參加羔羊婚宴嘅人有福。」天使又話:「呢啲都係上帝嘅真話。」
10 我就俯伏喺佢腳前,想拜佢,但佢對我話:「千萬唔好噉樣!我同你,及你嘅兄弟,所有守住耶穌啟示嘅真理嘅,都同樣係僕人。你應該敬拜上帝!」因為耶蘇所啟示嘅真理就係嗰啲感動先知嘅真理。」
騎白馬嘅人11 後來,我睇見天開咗。有一匹白馬,騎馬嘅叫做「真誠信實」;佢審判同打仗都很據正義。
12 佢嘅眼好似火燄,頭上戴住好多冠冕。佢身上寫住一個名,係除咗佢自己,冇人識嘅。
13 佢着嘅袍染滿血。佢嘅名叫做「上帝嘅道」。
14 天上嘅軍隊騎住白馬,着起潔白嘅麻依,跟住佢。
15 有一把鋒利嘅劍從佢口出黎;可以擊敗列國。佢必用鐵杖管轄佢哋,並且要喺全能上帝忿怒嘅榨酒池裏搾出烈酒。
16 喺佢嘅衣服同腿上寫着「萬王之王,萬主之主」呢個名號。
17 我又睇見一位天使企喺太陽嗰處。向空中所有嘅飛鳥大聲話:「嚟喇,一齊嚟參加上帝嘅大筵席!
18 嚟食君王、將領,同士兵嘅肉,亦食馬同騎士嘅肉,又食奴隸、自由人、尊貴卑微各類人嘅肉!」
19 我又睇見嗰隻獸同地上眾王,及佢哋嘅軍隊集合,同騎馬嘅及佢嘅軍隊爭戰。
20 嗰隻獸被捉住;喺獸面前行過奇蹟嘅偽先知亦一齊被捉住。(呢個偽先知曾用奇蹟迷惑有獸印記同拜獸像嘅人。)嗰隻獸同偽先知鑒生被扔落燃燒硫磺嘅火湖裏。
21 佢哋嘅軍隊都被騎白馬者口中吐出嘅劍所殺;所有飛鳥都食飽佢哋嘅肉。