Library · yue

啟示錄 2

俾以弗所教會嘅信息

1 「你要寫信俾以弗所教會嘅使者,話:『嗰位右手揸住七星、喺七金燈臺中行走嘅,』話:

2 我知你嘅行為:你點樣勤力工作,點樣忍耐;我亦知你唔容忍壞人,曾考驗過嗰啲自稱係使徒而其實唔係使徒嘅人,認出佢哋係假冒嘅。

3 你有耐心,曾為我嘅緣故經歷患難,從來都冇退縮。

4 但有一件事我要責備你:就係你已經失去當初對我嘅愛心。

5 所以應該回想,你已經墮落到乜嘢地步!你要悔改,恢復當初愛心嘅行為。你若唔悔改,我就嚟,將你嘅燈臺從原處搬走。

6 不過,你有一優點:係你同我一樣恨惡尼哥拉派嘅所作為。

7 『聖靈向各教會講嘅話,有耳就應當聽!所有得勝嘅人,我必賜俾佢權利,可以食上帝樂園裏生命樹嘅果。』」

俾士每拿教會嘅信息

8 「你要寫信俾士每拿教會嘅使者,話:『嗰位開始嘅、終結嘅、死過又復生嘅,』話:

9 我知你嘅患難同貧窮;但實際上你係富足嘅!我知你被嗰啲自稱係猶太人嘅詆毀;其實佢哋並唔係猶太人,係撒但嘅同黨!

10 你唔使怕你將要遇到嘅苦難。睇吓!魔鬼要考驗你哋,將你哋中一啲人鎖喺監獄裏;使你哋被試煉,你哋必受十日嘅苦難。你必要至死忠心,我就賜俾你生命嘅冠冕。

11 『聖靈向各教會講嘅話,有耳就應當聽!所有得勝嘅人絕唔會受第二次死亡嘅災害。』」

俾別迦摩教會嘅信息

12 「你要寫信俾別迦摩教會嘅使者,話:『嗰位有兩刃利劍嘅,』話:

13 我知你嘅住處係撒但稱王嘅地方。你對我忠誠,甚至當我忠心嘅見證人安提帕喺撒但嘅地盤被殺時,你仍然堅守我嘅名,並冇棄絕我嘅道。

14 但有啲事我要責備你:你哋中有人服從巴蘭嘅教訓;巴蘭曾教導巴勒,將絆腳石放喺以色列人前,叫佢哋食祭偶像嘅食物,又犯淫亂嘅事。

15 你哋中亦有人服從尼哥拉派嘅教訓。

16 所以,你要悔改,若唔悔改,我馬上就嚟,用我口中嘅劍攻擊佢哋。

17 『聖靈向各敎會所講嘅話,有耳就應當聽!所有得勝嘅人,我必賜俾佢隱藏嘅嗎哪。並俾佢白石,石上寫落新名;除接受嘅人,冇人識得嘅。』」

俾推雅推喇教會嘅信息

18 「你要寫信俾推雅推喇教會嘅使者,話:『嗰位眼似火燄、腳似銅嘅上帝之子話』:

19 我知你嘅行為、愛心、信心、事奉,同忍耐。我知你後來所做嘅比以前所做嘅重好。

20 但有一件事我要責備你:係你容忍嗰個自稱係先知嘅女人耶洗別。佢教導並勾引我嘅僕人行淫,食祭偶像之物。

21 我曾俾佢時間,等佢悔改,但佢唔肯悔改佢嘅淫行。

22 我要使佢病喺床;嗰啲同佢行淫嘅,若唔悔改所行嘅,我就要佢哋同佢一樣遭受大患難。

23 我又必擊殺跟從佢嘅人,使各教會知道,我鑒察人嘅思想同意念。我必照你哋每個人所做嘅,報應你哋。

24 至於你哋推雅推喇其餘嘅人冇跟從邪說,冇學習所謂撒但嘅奧秘。我話你哋知,我唔會再將其他嘅重擔加俾你哋。

25 但你哋要持守你哋已經有嘅,直到我嚟。

26 所有得勝、又遵行我命令到底嘅人,我必賜俾佢權柄,同我父俾我嘅一樣;嚟統治萬國,

27 用鐵杖治理佢哋,好以打碎陶器一樣打碎佢哋。

28 我又將晨星賜俾得勝嘅人。

29 『聖靈向各教會講嘅話,有耳就應當聽!』」