Library · yue

啟示錄 3

俾撒狄教會嘅信息

1 「你要寫信俾撒狄教會嘅使者,話:『嗰位有上帝嘅七靈同七星嘅話』:我知你嘅行為;按名你係生,實際你係死嘅!

2 所以,你要警醒,堅固嗰啲剩落將近死嘅;因為我睇出你所做嘅,我上帝面前仍然唔完全。

3 所以,你要記得你所聽、所接受嘅教訓,要認真遵守,離棄你嘅罪惡。若唔警醒,我必好似賊突然嚟到,你絕唔會知我幾時嚟。

4 但喺撒狄,你哋仍然有人將衣服保持得好乾淨;佢哋要着白袍,與我同行,因為佢哋係配得噉嘅。

5 所有得勝嘅人亦要同樣着白袍;我絕唔會喺生命冊抺去佢嘅名。喺我父同佢嘅使者前,我將公開承認佢係屬我嘅。

6 『聖靈向各教會講嘅話,有耳就應當聽!』」

俾非拉鐵非教會嘅信息

7 「你要寫信俾非拉鐵非教會嘅使者,話:『嗰位聖潔真實、揸往大衛嘅鎖匙、開咗就冇人能閂、閂咗就冇人能開嘅,』話:

8 我知你嘅行為;你只有啲力量,亦曾遵守我嘅教訓,唔棄絕我嘅名。我已經喺你前開咗一度門,係冇人能閂嘅

9 嗰啲撒但嘅同黨,自稱係猶太人其實唔係猶太人,乃係講大話嘅,我要使佢哋在你腳前下拜,使佢哋知道我已經愛你。

10 因為你遵守我嘅命令,忍耐到底,所以喺患難臨到全世界、全人類受試煉時,我保守你,免去你嘅試煉。

11 我必好快嚟。你要持守你所有嘅,免至有人搶走你嘅冠冕。

12 所有得勝嘅人,我必使佢成為我上帝聖殿中嘅柱;佢永遠唔再離開。我喺佢身上寫落我上帝嘅名同我上帝之城嘅名,(此城係從天我上帝處降落嚟嘅新耶路撒冷)重有我嘅新名。

13 『聖靈向各教會講嘅話,有耳就應當聽!』」

俾老底嘉教會嘅信息

14 「你要寫信俾老底嘉教會嘅使者,話:『嗰位「阿們」,忠實可靠嘅見證人,亦係上帝創造嘅根源,』話:

15 我知你嘅行為;唔冷唔熱;我情願你或冷或熱!

16 因為你好似溫水一樣,既然唔冷亦唔熱,我就要從我口吐你出去!

17 你話:我富足有餘,一啲都冇缺乏。但係,你唔知你自己實在係困苦可憐!貧窮、盲眼,赤身嘅。

18 所以,我勸你向我買精煉嘅金,等你富足;又買白袍着,等你赤身嘅羞恥,唔使顯露;又買眼藥搽你嘅眼,等你能睇見。

19 所有我所愛嘅人,我都責備管教。所以,你要熱心,離棄罪惡。

20 睇吓,我企喺門外敲門;若有人聽見我聲就開門,我必入佢處。我同佢,佢亦同我一齊食飯。

21 所有得勝嘅人,我必賜特權俾佢,喺我寶座上同我一齊坐,好似我已經得勝,現今同我父同坐喺佢寶座上一樣。

22 『聖靈向各教會講嘅話,有耳就應當聽!』」