啟示錄 5
羔羊嘅書卷1 我睇見坐喺寶座嘅,右手有書卷;裏外都有字寫,用七印封住。
2 我又睇見一位大力嘅天使,大聲宣佈話:「邊個配揭開呢啲印、展開書卷呢?」
3 無論喺天、喺地,喺地下,都冇一個能展開書卷嚟讀。
4 我大聲喊,因為冇人配睇個書卷。
5 於是,長老中有一位對我話:「唔使喊!睇吓,猶大支派出嚟嘅獅—大衛嘅後代已經得勝;佢能揭開七印,展開書卷。」
6 此後,我睇見被四生物同長老圍住嘅寶座處,有羔羊企喺處。羔羊好似被宰殺過嘅,有七角,七眼,即係上帝嘅七靈,係奉派去普天下嘅。
7 羔羊上嚟,從坐喺寶座上嗰位嘅右手中將書卷接過嚟。
8 佢噉樣做時,四生物同二十四位長老就俯伏喺羔羊前。每位長老都拎住豎琴同裝滿香嘅金爐;香係聖徒嘅禱告。
9 佢哋唱新歌話:惟有你配攞書卷,配揭開七印;因為你曾被殺!由你嘅犠牲流血,從各部落,各語言、各民族、各國將人贖返嚟,令佢哋歸俾上帝。
10 你令佢哋成為國民嘅祭司,歸俾上帝;喺地上執掌王權。
11 我睇見又聽聞千千萬萬天使嘅聲!佢哋喺寶座、四生物,同長老嘅周圍,
12 大聲話;曾被殺嘅羔羊,係配得權柄、豐富、智慧、能力、尊貴、榮耀,頌讚嘅!
13 我又聽見喺天、喺地,喺地下,喺海中同天地間一切所有被造之物,都話:願頌讚、尊貴、榮耀,權柄,歸俾坐寶座嘅嗰位同羔羊,直到永遠!
14 四生物就話:「阿們!」眾長老亦府伏喺處敬拜。