Library · yue

啟示錄 6

開印

1 我睇見羔羊揭開七印中第一印。嗰時,就聽見四生物中一個發出好似雷轟嘅聲,話:「你嚟!」

2 我一睇,就見一匹白馬;騎馬嘅揸住弓,接受賜俾佢嘅冠冕,就出發打仗,贏咗又贏。

3 羔羊揭開第二印時,我聽見第二個生物話:「你嚟!」

4 於是另一匹馬出嚟,係紅色嘅。騎馬嘅得到權柄可以從地上奪去太平,互相殘殺;佢又得到一把大刀。

5 羔羊揭開第三印時,我聽見第三個生物話:「你嚟!」我一睇,就見一匹黑馬;騎馬嘅手冚住天平。

6 我聽見喺四生物中似乎有聲話:「一日嘅人工只能買一公升小麥,一日嘅人工只能買三公升大麥。橄欖油同酒都唔好整壞!」

7 羔羊揭開第四印時,我聽見第四個生物話:「你嚟!」

8 我一睇,就見一匹灰色嘅馬;騎馬嘅叫做「死亡」,陰間亦跟住佢。佢哋得權柄,可以用戰爭、饑荒、瘟疫,野獸殺死地上四分之一嘅人。

9 羔羊揭開第五印時,我睇見喺祭壇下有為上帝嘅道、作見證被殺嘅人嘅靈魂。

10 大聲呼叫話:「聖潔真實嘅主宰!你要等到幾時致審判地上嘅人、為我哋流嘅血伸冤呢?」

11 於是,佢哋各人接受白袍,又對佢哋話,重要安息一陣,直到兄弟亦好似佢哋一樣被殺嘅人嘅數目滿咗。

12 我又睇見羔羊揭開第六印。嗰時,地大震動;太陽變黑,好似黑麻布;月亮變紅,好似血;

13 星從天墜落,好似重未成熟嘅無花果被暴風從樹上吹落一樣。

14 天就被遷移好似書卷被捲起,山嶺海島都從原處被遷移。

15 地上嘅君王、統治者、將領、有錢有勢嘅、奴隸,同自由人,都匿埋喺山洞山巖裏。

16 佢哋向山同山巖話:「倒落我哋身上喇!將我哋藏埋喇,等我哋躲避坐寶座者嘅面同羔羊嘅義怒!

17 因為佢哋忿怒嘅大日已到;邊個能企得住呢?」