Library · yue

啟示錄 7

十四萬四千以色列人

1 後來,我睇見四位天使企喺地嘅四極,擋住地上四面嘅風,等風唔吹喺地上、海上,及樹上。

2 我又睇見另外一位天使,捧住永生上帝嘅印,從東方上嚟。向得到上帝賜嘅權柄、能破壞地同海嘅四位天使大聲話:

3 「唔好傷害地、海,同樹木,等我哋先喺上帝僕人嘅額上蓋印。」

4 我聽見以色列各支派中受印嘅數目有十四萬四千:

5 猶大支派受印嘅有一萬二千;流便支派有一萬二千;迦得支派有一萬二千;

6 亞設支派有一萬二千;納大利支派有一萬二千,馬拿西支派有一萬二千;

7 西緬支派有一萬二千;利未支派有一萬二千;以撒迦支派有一萬二千;

8 西布倫支派有一萬二千;約瑟支派有一萬二千;便雅憫支派有一萬二千。

嚟自各地嘅羣眾

9 後來,我睇見一大羣人,數目難以計算。佢哋係從各國、各部落、各民族、各語言嚟嘅,企喺寶座同羔羊前,着住白袍,手拎住棕樹枝。

10 大聲話:「願救恩歸俾坐寶座我哋嘅上帝亦歸與羔羊!」

11 眾天使都企喺寶座、所有長老,同四生物嘅周圍。喺寶座前俯伏喺地,敬拜上帝,

12 話:「阿們!願頌讚、榮耀、智慧、感謝、尊貴、權柄、能力都歸俾我哋嘅上帝,直到永遠!阿們。」

13 有一位長老問我:「嗰啲着白袍嘅係邊個?係從邊處嚟嘅?」

14 我答話:「主呀,你知道。」佢對我話:「呢啲人係經過大迫害嘅。佢哋用羔羊嘅血將自己嘅衣服洗得乾淨潔白。

15 所以,佢哋喺上帝嘅寶座前,日夜喺佢嘅聖殿裏事奉佢。坐寶座嘅上帝要親自庇護佢哋。

16 佢哋唔再餓,唔再渴;太陽同炎熱都不能夠傷害佢哋。

17 因為寶座中嘅羔羊必牧養佢哋,帶佢哋到生命嘅水源;上帝亦抺乾佢哋嘅眼淚。