啟示錄 8
第七印1 羔羊揭開第七印時,天上靜咗差唔多半個鐘頭。
2 然後,我睇見企喺上帝前嘅七位天使;佢哋接受七枝號筒。
3 另外有一位天使,揸住金香爐,企喺祭壇旁邊。佢得到好多香,要同眾聖徒嘅禱告一齊獻喺寶座前嘅金祭壇處
4 嗰啲香嘅煙同眾聖徒嘅禱告從天使手中升到上帝前。
5 天使用祭壇嘅火裝滿香爐,然後倒落地。連隨就有雷轟、響聲、閃電,地震。
號筒6 然後,嗰七位揸住七枝號筒嘅天使就預備吹。
7 第一位天使吹號就有冰雹同火,摳埋血,落喺地上。於是地嘅三分一、樹木嘅三分一被燒;所有嘅青草亦被燒。
8 第二位天使吹號,就有一座睇嚟好似燒着嘅大山被扔落海。海嘅三分一變成血,
9 海中嘅活物死咗三分一,船隻亦壞咗三分一。
10 第三位天使吹號,就有燒着嘅大星好似火把,從天跌落嚟,喺三分一嘅河流同一切嘅水源處。
11 (此星叫做「苦澀」。)於是水嘅三分一變苦。因水變苦,就死咗好多人。
12 第四位天使號,太陽嘅三分一、月亮嘅三分一,星星嘅三分一都被襲擊。以致日、月、星失去三分一嘅光;日頭嘅三分一冇光,夜晚亦係噉。
13 我睇見又聽聞一隻飛喺高空嘅鷹大聲話:「三位天使就要吹其餘嘅號筒,你哋地上嘅人有禍咯!有禍咯!有禍咯!」